Европарламент Brexit шартларига доир резолюцияни тасдиқлади

Европарламент (ЕП) депутатлари Буюк Британиянинг ЕИ таркибидан чиқишига доир шартларга ойдинлик киритувчи резолюцияни маъқуллашди. Овоз бериш жараёни Европа Иттифоқи парламентининг Страсбургдаги пленар сессиясида бўлиб ўтган. Бу ҳақда ТАСС агентлиги хабар қилмоқда.

Ҳужжат қабул қилинишини 516 депутат маъқуллаган, 133 нафари қарши чиққан, 50 нафар вакил бетарафлигини билдирган. Унда яқин ҳафталар ичида Лондон ва Брюссель ўртасида бошланадиган Brexit бўйича бўлғуси музокараларнинг оҳангига озми-кўпми ойдинлик киритилган. "Европарламент қараши Буюк Британиянинг ЕИдан чиқишига доир якуний шартларни аниқлашда ҳал қилувчи аҳамиятга эга", - деб таъкидлаган ЕП раиси Антонио Таяни.

"Музокаралар шаффоф бўлиши керак, - дейилади маъқулланган резолюция матнида. – Буюк Британия аввал зиммасига олган мажбуриятларга тўла амал қилиши даркор, Европа бюджети доирасидаги молиявий мажбуриятлари ҳам шу жумладан". "ЕИ ва Буюк Британия ўртасидаги келгуси муносабатларни муҳокама қилиш, Бирлашган Қиролликнинг ташкилот таркибидан чиқиши борасидагии музокараларда сезиларли олға силжишлар қайд этилганидан сўнг мумкин  бўлади", - дейилади ҳужжатда.