Telegram мессенжерининг компьютер версиясида овозли қўнғироқлар жорий қилинди

Telegram мессенжери ўзининг компьютерларга мўлжалланган версиясида фойдаланувчилар учун овозли қўнғироқлар функциясини ишга туширди. Янги функция дастурнинг Windows, macOS ва Linux операцион тизимларидаги версияларида жорий қилинди, деб хабар бермоқда vc.ru нашри.

Telegram’нинг янгиланмасига берилган таърифда мессенжер ёрдамида қўнғироқларни амалга ошириш "сунъий онг ёрдамида мунтазам такомиллаштириб борилиши" айтилган. Қўнғироқлар хавфсизлигини дастурнинг мобил версияларидаги шифрлаш тизими (жумладан эмозилар кетма-кетлиги орқали уланиш хавфсизлигини текшириш) кафолатлайди. 

Telegram’нинг янгиланган версиясида овозли қўнғироқлардан ташқари, эмози, стикер ва анимациялаштирилган GIF-тасвирларга эга ён панел жорий қилинди. Панелни мессенжерни бутун экранга ёйган ҳолдаги кўринишида фаоллаштириш мумкин. .

Telegram янгиланмаси чатлар маъмурларига фойдаланувчилар хабарларини ўчириш, супергуруҳлар (5 минггача иштирокчига эга гуруҳлар) эгаларига фойдаланувчиларнинг "қора рўйхатини" бошқариш имкониятини берди.

12 май куни Telegram дастурчилари компьютерлар учун мўлжалланган дастурнинг альфа-версияси фойдаланувчилари учун синов режимида овозли қўнғироқларни ишга туширишганди. 30 март куни шифрланган қўнғироқлар мессенжернинг мобил версияси фойдаланувчилари учун жорий қилинганди.