ЖАРда ноқонуний олтин конидаги портлашдан кейин 29 киши жасади топилди

Фото: Flickr / andy_carter

Жанубий Африка Республикаси фавқулодда хизматлари ўтган ҳафта ноқонуний олтин конида юз берган портлашдан кейин вайроналар остидан 29 киши жасадини чиқариб олишди, деб хабар бермоқда полицияга иқтибос келтирган ҳолда маҳаллий Times нашри.

Портлаш аввал Harmony Gold компаниясига тегишли бўлган Фри-Стейт вилоятидаги олтин конида юз берган. Кон ўзлаштириб бўлинган деб ҳисобланганига қарамасдан, уларда ноқонуний равишда олтин қазиб олиш давом этган.

"Бугун 11 нафар ноқонуний олтин қидирувчилар қўлга олинди. Уларнинг айтишича, ер остида ҳали ҳам жасадлар қолган", деб айтган полиция вакили генерал-лейтенант Лерато Молале.

Маълум қилинишича, ҳалок бўлганларнинг кўпчилиги Зимбабве, Мозамбик ва Лесотодан келган одамларни ташкил қилади.