Тошкент вилоятида фирибгарлик жиноятлари кўп содир этилмоқда

Сўнгги вақтларда Тошкент вилоятида фирибгарлик билан боғлиқ жиноятлар содир этилиши ҳолатлари кўплаб қайд этилмоқда. Тошкент вилояти ИИБ тергов бошқармаси бошлиғи,  подполковник Умид Кенжаевнинг сўзларига кўра, бунга инсонлар ўзаро моддий бойликлар олди-бердисида шартнома қилмасликлари, ишонувчанликлари бош омил бўлмоқда. 

Вилоят Прокуратураси бўлим бошлиғи Собиржон Темировнинг маълумотларига қараганда, 2017 йилнинг ўтган даври мобайнида Тошкент вилоятида жами 3325та турли жиноятлар содир этилган. Шулардан 27та қотиллик, 70та оғир тан жароҳати етказиш, 16та номусга тегиш, 22та босқинчилик, 56та талончилик, 1011та ўғирлик, 306таси фирибгарлик ва бошқа турдаги жиноятлардир. 

Шу билан бирга, Темировнинг айтишича, олиб борилаётган профилактика чора-тадбирлари натижасида, гарчи рақамларда жиноятчилик сони ошганига қарамай, қасддан одам ўлдириш 5тага, қасддан оғир тан жароҳати етказиш 5тага, босқинчилик 20тага, бундан ташқари товламачилик ва безорилик жиноятларининг камайишига эришилган. Шунингдек, умумий жиноятчилик кўрсаткичлари Ангрен, Бекобод, Олмалиқ, Чирчиқ шаҳарларида, Бўстонлиқ, Оққўрғон ва Чиноз туманларида камайган. 

Вилоят ҳудудида содир этган турли жиноятлари учун қидирилаётганлар сони йил бошига нисбатан 299тага камайган.