Бангладешнинг АҚШдаги дипломати ўз юртдошини қул каби ишлатганликда айбланмоқда

Бангладешнинг АҚШдаги бош консули ўринбосари Муҳаммад Шохилдул Исломга ноқонуний меҳнат фаолиятини ташкиллаштириш айблови қўйилди. Бу ҳақда Нью-Йорк шаҳрининг Куинс туман прокуратураси баёнотига иқтибос келтирган ҳолда NY Daily News нашри хабар бермоқда. 

Прокурор Ричард Брауннинг айтишича, 45 ёшли дипломат шунингдек "ўз қўлида ишлаган одамга ҳақ тўлашни истамаганликда, унга нисбатан жисмоний куч қўллаш ва таҳдид қилишда" айбланмоқда. Ушбу иш ҳужжатларига кўра, Ислом ўз юртдошининг АҚШга келишини ташкиллаштирган. Сўнгра у юртдошининг паспортини олиб қўйиб, ўзига ишлашга мажбур қилган ва мунтазам калтаклаган. У, шунингдек, юртдошига депортация қилиш ва унинг оила аъзоларини ўлдириш билан таҳдид қилган.

Суд ушбу ишни 28 июнда кўра бошлайди. Агар дипломат айбдор деб топилса, 15 йилга озодликдан маҳрум қилиниши мумкин.