Москва давлат халқаро муносабатлар институти билан Ҳамкорлик тўғрисидаги битим имзоланди

2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси, Ўзбекистон Республикаси Президентининг 2017 йил 20 апрелдаги “Олий таълим тизимини янада ривожлантириш чора-тадбирлари тўғрисида”ги ПҚ-2909 сонли Қарорини ижро этиш ҳамда Ўзбекистон Республикаси Ташқи ишлар вазирлиги Жаҳон иқтисодиёти ва дипломатия университетининг ривожланиш концепциясига мувофиқ, Россия Ташқи ишлар вазирлиги ҳузуридаги Москва давлат халқаро муносабатлар институти (Университет) билан Ҳамкорлик тўғрисида Битим имзоланди.

Мазкур битим халқаро тоифадаги мутахассисларни етиштириш, қайта тайёрлаш ва малакасини ошириш, шунингдек янги бакалавр ва магистрлик дастурларини татбиқ этиш, биргаликда ўқув-илмий тадбирларни ўтказиш, талабалар, аспирантлар ва докторантлар алмашинуви, илмий-педагогик кадрларни амалиёти ва малака оширишини ташкил этиш, Ўзбекистон-Россия сиёсий ва савдо-иқтисодий муносабатларни ривожлантириш соҳасида, шунингдек бошқа долзарб минтақавий ва халқаро сиёсий мавзулар бўйича ҳодиса ва жараёнларнинг ҳозирги вақтдаги юқори динамикасини ҳисобга олган ҳолда эксперт-таҳлилий лаборатория ва марказларнинг ўзаро ҳамкорлигини йўлга қўйиш соҳасида кенг қамровли ҳамкорликни ривожлантиришни кўзда тутади.

Ўзбекистон Республикаси Ташқи ишлар вазирлиги Жаҳон иқтисодиёти ва дипломатия университетига Ўзбекистон Республикасининг  Биринчи Президенти ташаббуси билан 1992 йилда асос солинган бўлиб, университет дипломатик хизмат ва халқаро мутахассисларни тайёрлаш ҳамда малакасини ошириш, шунингдек ташқи сиёсат, халқаро иқтисодий муносабатлар ва халқаро ҳуқуқ соҳаларида илмий-тадқиқот фаолиятини амалга оширади.