Анталияда Ўзбекистон капитали иштирокида қарийб 30 та компания фаолият кўрсатмоқда

Туркиянинг Анталия шаҳрида 2017 йилнинг 1 июнь ҳолатига кўра, хорижий капиталга эга компаниялар сони ўтган йилнинг шу даври билан таққослаганда 4,3 фоизга ошди – 3100 гача. Бу ҳақда Анталия савдо-саноат палатаси маълумотларида айтилади.

Бугунги кунда Анталияда Россиянинг 500 та, Германиянинг 450 та, Нидерландиянинг 182 та, Саудия Арабистонининг 176 та, Эроннинг 144, Озарбойжон ва Буюк Британиянинг 141 тадан, Франциянинг 138 та, Қозоғистоннинг 112 та, Украинанинг 108 та, Американинг 84 та, Испаниянинг 60 та, Италиянинг 59 та, Суриянинг 57 та ва Австриянинг 48 та компанияси фаолият кўрсатмоқда.

Бундан ташқари, Анталияда Бельгия ва Швейцария капиталига эга 35 та, Дания ва Хитойнинг 32 тадан, Британиянинг 31 та, Ироқнинг 29 та, Қирғизистоннинг 27 та, Ўзбекистоннинг 26 та, Туркманистоннинг 25 та ва Греция капиталига эга 24 та компания бор.

Анталия савдо-саноат палатаси директорлар кенгаши раҳбари Довут Четиннинг хабар беришича, Анталия хорижий капиталга эга компаниялар сони бўйича Истанбулдан сўнг иккинчи ўринда туради.

Унинг сўзларига кўра, Анталияда сўнгги бир йил ичида хорижий капиталга эга 129 та компания фаолият бошлади, уларнинг асосий акциядорларига Эрон, Саудия Арабистони ва Сурия фуқаролари айланган.