Қозоғистондан сўнгги 10 йилда 10 млрд долларлик ўғирланган пуллар олиб чиқиб кетилди

Қозоғистонда сўнгги 10 йилда ўғирланган маблағларни хорижга олиб чиқиш бўйича 36 та жиноий иш қўзғатилган. Бу ҳақда Kazakhstan Today маълум қилди.

"Жиноятчилар 10 млрд долларни ўмаришган ва уларни хорижга олиб чиқиб кетишган. Бу ЯИМдан 8,1 фоизга тенг", - дея хабар беришган Қозоғистон бош прокуратурасидан.

"Бизнинг бу ишдаги энг заиф томонимиз – малакали терговчиларнинг йўқлиги. Улар хорижий давлатларга сўровларни тўғри тузиш, активларга хатлов қўйиш ва уларни ватанга қандай қайтарилишини билмайдилар. Хорижий ҳамкасблар билан қалин алоқа йўқ", - дея таъкидлаб ўтишган идорадан.

Шу билан бирга, мамлакат бош прокуратурасидан айтилишича, ўтган йилнинг октябридан активларни қайтариш бўйича лойиҳани амалга ошириш бошланди. Биринчи навбатда академия базасида БМТ бошқармаси ва АҚШ элчихонаси кўмагида 169 терговчига таълим берилди, шунингдек, 10 нафар миллий мураббийлар тайёрланди.

"Хорижий давлатларнинг ҳуқуқни муҳофаза қилиш органлари билан маълумотларни тезкор алмашиш мақсадида Европа ва Осиёнинг маълумот алмашиш бўйича жаҳон тармоқларига уландик. Эндиликда, расмий ёзишмага вақт сарфлаш ва жавобни узоқ кутиш керак эмас", - дея қайд этишган прокуратурадан.

Шунингдек, хабар қилинишича, тегишли идоралар билан хориждан жиноий даромадларни қайтариш бўйича услублар ишлаб чиқилди. Бунда АҚШ, Сингапур, Австралия, Буюк Британия, Канада каби давлатларнинг тажрибасига таянилди.

"Қўшма ишлар натижасида 60 миллион долларга хатлов қўйилди. Айни дамда уларни қайтариш бўйича ҳаракат қилмоқдамиз", - дея хабар беришган мамлакат бош прокуратурасидан.