Европа Иттифоқи чегараларида ноқонуний муҳожирлар сони учдан икки қисмга камайди

Европа Иттифоқи давлатлари чегараларида ноқонуний муҳожирлар сони жорий йил бошидан учдан икки қисмга камайди, деб айтилган ЕИнинг ташқи чегаралар хавфсизлиги агентлиги (Frontex) маълумотларида. 

“2017 йилнинг биринчи 7 ойида аниқланган ноқонуний муҳожирлар ўтган йилнинг шу даврига нисбатан учдан икки қисмга, яъни 127 минг 100 нафаргача камайган”, деб айтилган хабарда.

Агентлик маълумотларига кўра, июлда ЕИнинг 4 та асосий миграция йўналишларида чегараларни ноқонуний кесиб ўтишнинг 15,7 мингта ҳолати аниқланган.  

Frontex’да таъкидланишича, Италияга келаётган муҳожирлар сони июль ойига нисбатан ярмига камайган, Испания эса 2009 йилдан бери энг оғир миграция босимини бошидан кечирмоқда. 

Июлда Нигерия, Гвинея, Эритрея, Судан фуқаролари марказий Ўрта ер денгизи йўналишида аниқланган муҳожирлар ичида энг кўп миқдорда бўлган. Жорий йилнинг дастлабки 7 ойида нигерияликлар Европага келганлар орасида энг кўп бўлган (Италияга денгиз орқали келган ҳар олтинчи муҳожир нигериялик бўлган). Ундан кейинги ўринларда Бангладеш, Гвинея ва Кот-д'Ивуар фуқаролари келмоқда.

Грецияга денгиз ва қуруқлик орқали келган муҳожирлар сони июлда 2,3 минг кишини ташкил қилган ва бу июндагидан чорак қисмга кам бўлган. 2017 йилнинг дастлабки 7 ойида Грецияга 15750 нафар муҳожир келган, бу эса 2016 йилнинг шу давридагидан 90 фоизга камроқни ташкил қилган.

Июлда шарқий Ўрта ер денгизи йўналишида аниқланган муҳожирлар орасида сурияликлар, ироқликлар ва афғонлар кўпчилик бўлган.