Германия тарихида энг оммавий қотилликлар серияси тиббиёт ходими томонидан амалга оширилган бўлиши мумкин

Германиялик тиббиёт оғаси (медбрат) Нильс Ҳегель 84 нафар беморнинг қотиллигида гумонланмоқда. У ҳозирда умрбод озодликдан маҳрум этилган. Бу ҳақда Ольденбургда 28 август куни маълум қилинди.

Ҳегель маълум дори воситаларидан атайин фойдаланишда гумонланмоқда. Бунинг оқибатида беморларда юрак ёки қон айланиши билан боғлиқ муаммолар келиб чиққан. Шундан сўнг у ҳамкасблари ҳурматини қозониш учун беморларни жонлантирмоқчи бўлган, бироқ кишиларни қутқариш ҳар доим ҳам рўй бермаган.

Полиция янги тергов доирасида уч йил давомида юздан ортиқ тиббий картани ўрганди ва экспертиза учун юзтадан кўпроқ эксгумация ўтказди.

Агарда ушбу қотилликлар суд томонидан тасдиқланса, бу Германия тарихидаги энг оммавий қотилликлар сериясига айланади.

40 ёшли Ҳегель ҳозирда умрбод озодликдан маҳрум этиш жазосига маҳкум қилинган. Уни олти эпизод бўйича айбдор, деб тан олишган. У сўроқлар давомида ўнлаб қотилликларни амалга оширганини маълум қилган.