АПЛ. Марсиалнинг голи «Манчестер Юнайтед»га «Тоттенҳэм» устидан ғалаба келтирди

Англия Премьер-лигасининг 10-турида «Манчестер Юнайтед» ўз майдонида «Тоттенҳэм»ни қабул қилди.

Биринчи бўлим меҳмонларнинг устунлигида ўтди. Аммо гол уриш учун ҳар иккала жамоада биттадан вазият бўлди. 

12-дақиқада, Рэшфорднинг чамаси 30 метр масофадан амалга оширган жарима зарбасидан сўнг, дарвозабон Льорис қийинчилик билан тўпни қайтара олди.

41-дақиқада, бурчак зарбаси амалга оширилгач, Дайер яқин масофадан дарвозани ўққа тутди, бироқ унинг зарбаси кучли чиқмади.

Иккинчи бўлимнинг биринчи ярмида «МЮ» катта босим уюштириб, хавфли ҳужумларни амалга оширди. 

54-дақиқада Мхитаряннинг жарима майдони ичидаги кучли зарбасини Льорис қайтара олди. Орадан бир дақиқа ўтгач, яна унинг аниқ зарбасига дарвозабон тўғаноқ бўлди.

73-дақиқада Лукаку ҳимоячилар хатосидан унумли фойдалана олмади. Бу сафар ҳам Льорис зарбани қайтаришга эришди. Орадан сал ўтгач, Деле Алли тўпни дарвозага йўллашига сал қолди. Аммо унинг яқин масофадан йўллаган зарбаси ноаниқ кетди. 

79-дақиқада Лукакунинг боши билан йўллаган зарбасидан сўнг, тўп дарвоза устунига тегиб қайтди.

81-дақиқада ҳисоб очилди. Де Хеа тўпни ўйинга киритиб, майдон марказига йўллади. Лукаку уни боши билан рақиб жарима майдонига йўллади. Тўпни эгаллаб олган Марсиал яқин масофадан аниқ зарба йўллаб, ҳисобни очди.

Қолган дақиқалар да бошқа гол урилмади ва «МЮ» кичик ҳисобдаги ғалабани қўлга киритди.

Бу натижадан сўнг, «МЮ» 23 очко билан иккинчи, «Тоттенҳэм» эса 20 очко билан мусобақа жадвалида учинчи ўринни эгаллаб турибди.

АПЛ, 10-тур
Манчестер Юнайтед – Тоттенҳэм 1:0 (0:0, 1:0)
28 октябрь, «Олд Траффорд» стадиони
Гол: 1:0 – 81 Марсиал 
Манчестер Юнайтед – Де Хеа, Смоллинг, Жонс, Валенсия, Байи, Эррера, Янг (Дармиан, 90), Матич, Мхитарян (Лингард, 65), Рэшфорд (Марсиал, 70), Лукаку.
Тоттенҳэм – Льорис, Вертонген, Дэвис, Орье, Алдервейрелд, Алли, Дайер, Сиссоко (Дембеле, 62), Эриксен, Уинкс, Сон Хён Мин (Льоренте, 62).
Огоҳлантириш: Валенсия (73).