Покистонда ҳукуматдан норозиларнинг намойишлари кучайиб бормоқда

Покистон Ислом республикасида ҳукумат истеъфосини талаб қилувчиларнинг оммавий намойишлари кучайиб бормоқда. Шу кунларда хавфсизлик кучлари Исломободдаги палаткали лагерни тарқатиб юборишга уриниб кўрди. Бу радикалларнинг ҳуқуқ-тартибот идоралари вакиллари билан тўқнашувига олиб келди. 6 киши ҳалок бўлди, 250 дан ортиқ жароҳатланди. 

Полициянинг кескин ҳатти-ҳаракатларига жавобан мамлакат бўйлаб норозилик кайфияти кучайди. Сиёсатчилар армиянинг аралашувига чақираётган бўлса ҳам, улар шошилаётгани йўқ. 25 ноябрдан эътиборан мамлакатда ижтимоий тармоқлар ва хусусий янгиликлар телеканаллари фаолият юритмаяпти. 

Полициячилар Исломободни Равалпинди билан боғлайдиган автомагистралдаги чорраҳани намойишчилардан тозалашга уринишлари қонли тўқнашувларга айланиб кетди. Намойиш ташкилотчиси ҳалок бўлганлар сони 17 кишини ташкил этаётганини таъкидламоқда. 

Намойишларни тарқатишга уринишлар уларнинг кучайишига сабаб бўлмоқда. Исломобод, Панжоб вилояти шаҳарлари, хусусан Лаҳор ва 18 млн аҳоли истиқомат қилувчи Карачи шаҳридаги намойишчилар машина шиналари, автомобиллар ва мотоциклларни ёқиб юбормоқда. 

Мамлакат парламентидаги иккинчи йирик мухолифат партияси «Таҳрики-Инсоф» тартибни тиклай олмагани учун ичкиишлар вазирининг истеъфосини талаб қилди.

Вазирлик, ўз навбатида, тартибни тиклаш учун қуролли кучлардан фойдаланишга рухсат берувчи буйруқни имзолади. 

Намойишлар ички сиёсий инқироз туфайли келиб чиқмоқда. 2017 йил июлида Покистон Олий суди бош вазир Наваз Шарифни истеъфога чиқарган эди. У коррупцияда айбланмоқда. Навбатдаги сайловлар 2018 йили бўлиб ўтади. 

Покистон адлия вазири Зоҳид Ҳамид мамлакат парламент қонунчилигига ўзгартириш таклифини билдирганидан сўнг бошланган намойишлар таъсирида ўз лавозимидан истеъфо берди. Намойишчилар парламент қасамёди матнига киритилиши таклиф этилган ўзгартиришларни динсизлик деб баҳолашди. Зоҳид Ҳамид ўз аризасини бош вазир Шаҳид Ҳоқон Аббосийга топширган, деб хабар қилмоқда Покистон давлат телевидениеси.