Гуржистоннинг собиқ раҳбари, Одесса областининг собиқ губернатори Михаил Саакашвили украиналиклар президент Пётр Поршенкосиз «янги йилни кутиб олишлари учун барча имкониятлари бор»лигини маълум қилган, деб ёзади РИА Новости.
Саакашвили олдинроқ унинг ҳамфикрлари Порошенкога импичмент эълон қилиш учун бутун мамлакат бўйлаб имзо тўплашни бошлаб юборганини айтган эди.
«Мен Порошенко томон кенг қамровли, тинч йўл билан ҳужумга тайёргарлик кўришни таклиф этаман... Ишонтириб айтаманки, агар яхшилаб ишласак, Янги йилни усиз кутиб олиш учун бизда барча имкониятлар бор», — деган Саакашвили Киевдаги йиғин чоғида.
Михаил Саакашвили шунингдек, ўзи ва украиналик ишбилармон Сергей Курченко ўртасида бўлиб ўтган, гўёки улар ўзаро ҳамкорликни йўлга қўйиш ҳақида келишиб олган суҳбатни ҳуқуқ-тартибот органлари сохталаштирганини таъкидлаган. Буни исботлаш учун полиграфда синалишга ҳам тайёр эканлигини билдирган.
Илгарироқ Украина бош прокуратураси Курченко ва Саакашвилининг ўзаро ҳамкорлик қилиши ҳақидаги суҳбати ёзилган аудиоёзувни ошкор этган эди.
«Улар менинг суҳбатимни сохталаштиришган. Мен дунёдаги исталган полиграф-тестдан ўтишга тайёрман», — деди у йиғин чоғида.
Саакашвили сешанба куни жиноий ташкилотлар аъзоларига кўмак бергани ва уларнинг жиноий фаолиятини яширганлик бўйича жиноят иши доирасида ҳибсга олинган эди. Бироқ тарафдорлари уни ҳуқуқ-тартибот органларидан тортиб олишган, шундан сўнг Киев марказига йўл олиб, президент импичментини талаб қилишган. Сиёсатчи Украинада қидирувга берилган. Чоршанба куни ҳуқуқ-тартибот органлари Саакашвилининг чодирли лагерига келишган, бироқ унинг тарафдорлари қаршилигига учрашган.
Украина бош прокурори Юрий Луценконинг билдиришича, Киевда Саакашвили томонидан уюштирилаётган акциялар собиқ президент Янукович атрофидаги инсонлар, хусусан, ишбилармон Курченко томонидан молиялаштирилмоқда ва Украинада давлат ҳокимиятини йиқитишга йўналтирилган. Саакашвили бу айбловларни бўҳтон деб атаган.
17 октябрдан буён Киевдаги Рада биноси олдида муддатсиз норозилик акцияси бўлиб ўтмоқда ва унинг қатнашчилари депутатлик дахлсизлигини бекор қилиш, сайлов ислоҳоти ўтказиш ва аксилкоррупция судини тузиш ҳақида қонун қабул қилинишини талаб қилишмоқда. Аввалига акцияга турли йўналишдаги сиёсий кучлар, жумладан, «Движение нових сил» партияси ҳам қўшилган эди. Митингларнинг биринчи ҳафтасидан сўнг қатнашувчиларнинг катта қисми норозилик акциясидан чиқишини билдиришган.
