Саудия Арабистонида ҳибсга олинган фаластинлик миллиардер қўйиб юборилди  

Саудия Арабистонида 12 декабрда аксилкоррупцион тергов доирасида сўроқ қилиниш учун ҳибсга олинган фаластинлик миллиардер Сабиҳ ал-Масрий озод этилди. У Ар-Риёддаги уйига қайтган. Бу ҳақда миллиардернинг оиласига яқин манбаларга иқтибос келтирган ҳолда Reuters ахборот агентлиги хабар берди. У яқин орада мамлакатни тарк этиш имкониятига эга бўлиши кутилмоқда.    

Тадбиркор ўзига ҳеч қандай айблов билдирилмаган ҳолда қўйиб юборилди.

Ал-Масрий Яқин Шарқдаги энг йирик банклардан бири Arab Bank раиси ва Zara Investment Holding асосчиси ҳисобланади. Банк Иордания пойтахти Амманда жойлашган. Масрий, шунингдек, Фаластиннинг энг бой одами, саноатчи Муниб ал-Масрийнинг жияни ҳисобланади. Миллиардер фаластинлик бўлса-да, Саудия Арабистони фуқаролигига эга.

Ноябрь охирида Саудия Арабистонида коррупцияга қарши кампания бошланган эди. Коррупцияда гумон билан ҳаммаси бўлиб 159 киши, жумладан, қироллик оиласи аъзолари ҳибсга олинган.