ОАВ: ИШИД етакчилари АҚШ вертолётларида эвакуация қилинди

Фото: AFP

АҚШ вертолётлари ИШИДнинг етакчиларини Суриянинг Даур-аз-Зор вилоятидан Ҳасака вилоятига эвакуация қилди. Бу ҳақда SANA ахборот агентлиги хабар бермоқда.

Ахборот агентлиги маълумотларига кўра, 28 декабрга ўтар кечаси бир нечта вертолёт Даур-аз-Зорнинг шимолий ҳудудидан ҳавога кўтарилиб, Ас-Сад лагери устидан пастлаб учиб, Ҳасака шаҳридан жанубдаги Ал-Басел тўғони яқинида қўнган.

Маълум қилинишича, вертолётлар бортларида АҚШ томондан қўллаб-қувватланувчи Сурия демократик кучлари томонга қочиб ўтган, ИШИД қўмондонлари бўлган. Таъкидланишича, АҚШ вертолётлари жангариларни биринчи марта эвакуация қилаётгани йўқ.

Ноябрда Маядинда Сурия армиясининг операцияси бошланишидан икки ҳафта олдин АҚШ вертолётлари ИШИДнинг шаҳарда қолган хорижий етакчиларини олиб чиқиб кетган.

Ҳарбий-дипломатик манбанинг айтишича, августда Буюк Британия ҳарбий-ҳаво кучлари Даур-аз-Зор шаҳри яқинида бўлган 20 дан кўпроқ дала қўмондони ва уларга яқин жангариларга Суриянинг шимолига кўчиб ўтишда ёрдам берган.

Бироқ АҚШ бошчилигидаги коалиция бу маълумотларни ёлғон деб атаб келади.

#АҚШ #ИШИД