Қашқадарёда иқтисодий комплекс ўлган - президент эски давр камчиликларини яна бир бор эслаб ўтди

28 январь куни Чироқчи туманида президент раҳбарлигида Қашқадарё вилояти фаоллари йиғилиши бўлиб ўтди.

Ушбу йиғилишда вилоятнинг ижтимоий-иқтисодий ҳолати танқидий баҳолар асосида таҳлил этилди. Мавжуд муаммолар очиқ гапирилди, мутасадди раҳбарларга тегишли кўрсатмалар берилди. Президент Қашқадарё вилоятидаги кичик бизнес ва хўжалик субъектлари фаолияти, уларнинг тугатилиши, тадбиркорликнинг оқсаши масаласига тўхталиб ўтди.

Қашқадарёда тадбиркорларга ёрдам бериш ҳолати бизни умуман қониқтирмайди. Вилоятда 2017 йил 1980та янги, кичик бизнес субъектлари ташкил этилган бўлса, 1650та субъект ўз фаолиятини якунлаган. Бу нима дегани, бу ёлғон маълумот дегани. Бу нимадан далолат, бу – вилоят ҳокими биринчи ўринбосарлиги бошчилигидаги иқтисодий комплекс ўлганидан далолат. 

Давлат раҳбарининг бу эътирозига вилоят ҳокимининг биринчи ўринбосари тугатилган бизнес субъектларининг низом жамғармаси шаклланмагани, айланма маблағлари етарли бўлмаганини мисол қилиб кўрсатган. 

«Буларнинг барчаси баҳона. Унда улар нега ташкил этилган? Масалан, Ғузор туманида 74та субъект ташкил этилган бўлса, 171та бизнес субъекти тугатилган. Жойлардаги вакилларингизни ишлатмайсизми? Бир пайтлардаги раҳбар «саккиз фоиз» деб ҳамма жойни ўлдириб кетди. Мен бу гапни айтишдан чарчамайман, негаки, у ҳаммани шунга ўргатиб кетди. Энди кабинетда ўтиришга ҳеч кимни қўймайман. Ўзбекистонда ундай замон тугаб бўлди. Ёпилаётган ҳар бир корхона бўйича алоҳида ишлаш лозим. Акажон, укажон, опа-сингилжон, корхонангизни ёпманг, ёпмаслигингиз учун нима қилиб берай, деб сўраш керак тадбиркорлардан. База қилиш керак.

Яна бир мисолга қаранг: Шаҳрисабз туманида 75та субъект ташкил этилган эмиш, шундан 120таси ёпилган. Ўтган йилнинг ўзида вилоятда 8800та хўжалик субъекти тугатилган ёки вақтинчалик фаолиятини тўхтатган. Бунинг оқибатида 10 минг 400дан зиёд иш ўрни йўқотилган», дея Шавкат Мирзиёевнинг сўзларини келтирган «Kun.uz» мухбири.