Ёпиқ иншоотларда Енгил атлетика бўйича Осиё чемпионатининг сўнгги, учинчи кунида ўзбекистонлик Александра Юркевская кўпкураш бўйича 3858 очко тўплаб, иккинчи ўринни эгаллади ва терма жамоамизга яна бир медални олиб келди. Енгил атлетика федерацияси матбуот хизмати бу ҳақида KUN.UZ'га хабар берди.
Теҳронда якунланган Осиё чемпионатида кўпкураш бўйича биринчи ўрин 4038 очко тўплашга муваффақ бўлган эронлик спортчига насиб этди. Учинчи поғона эса 3730 очко тўплаган туркманистонлик спортчи томонидан банд этилди.
Бундан олдин KUN.UZ'да 1-3 февраль кунлари Эрон пойтахтида бўлиб ўтган Енгил атлетика бўйича Осиё чемпионатида икки нафар ҳамюртимизнинг олтин медални қўлга киритгани ҳақида маълум қилинган эди. Хусусан, Надия Дусанова баландликка сакраш буйича 1-ўринни эгаллашга муваффақ бўлди, спортчимиз баландликка сакраш бўйича 1.87 м кўрсаткични қайд этди. Шунингдек Елена Смольянова ядро улоқтириш мусобақаларида энг яхши натижани (15.54 м) қайд этиб, олтин медаль соҳибасига айланди.
