Малайзиянинг самолётини қидираётган кема атайлаб 3 кун алоқага чиқмаган бўлиши мумкин

Малайзиянинг 2014 йил мартида йўқолган Boeing самолётини қидиришда иштирок этаётган, АҚШнинг Ocean Infinity компанияси кемаси Seabed Constructor 3 кун ўзининг жойлашган ўрни ҳақида маълумотларни бермаган. Бу ҳақда Fox News нашри хабар бермоқда. 

Кема самолётни 22 январда Ҳинд океанида қидиришни бошлаганди. Самолёт бўлакларини қидириш учун автоном сув ости қурилмалари ва гидролокаторлар қўлланган. Бироқ 1 февралда кеманинг жойлашган ўрни ҳақидаги маълумот автоматик идентификация тизимида янгиланмай қўйган. Бироқ кема 80 соатдан кейин яна радарларда пайдо бўлган ва у Австралиядаги Перт шаҳрига йўл олаётгани аниқланган. Ocean Infinity компаниясида ушбу вазиятга изоҳ берилмаган. “Автоматик идентификация тизими узатгичи ўчиқ бўлган. Савол шундаки, бу янги йўналишни тузишда экипаж хатоси бўлганми ёки атайлаб қилинганми?”, деб айтган геолокацион тизимлар бўйича мутахассис Ричард Кол.

Мутахассисларнинг фикрича, кема экипажи самолётни қидириш ўрнига хазина қидириш учун атайлаб ўзининг жойлашган ўрнини яширган бўлиши мумкин. 2016 йилда операция олиб борилаётган жойда 20-аср бошида чўккани тахмин қилинган савдо кемасига тегишли бўлаклар аниқланганди.

Malaysia Airlines авиакомпаниясининг Boeing 777-200 йўловчи самолёти 2014 йил 8 мартга ўтар кечаси бортида 227 йўловчи ва экипажнинг 12 аъзоси билан радарлар экранидан йўқолиб қолган. Самолёт Куала-Лумпурдан Пекинга учаётган бўлган. Тахмин қилинишича, самолёт Ҳинд океанининг жанубий қисмида фалокатга учраган.