Туркиялик инвесторлар Тошкент вилоятида туризмни ривожлантиришга қизиқиш билдирмоқда

2018 йилнинг 9 февраль куни Туркия Республикаси инвесторлари Ўзбекистонга ташриф буюришди. Улар мамлакатда 13 февралга қадар бўлишади. 

Икки томонлама бўлиб ўтган учрашувларда Ўзбекистон Республикаси Тошкент вилоятига Туркия давлатидан сармоядорларни жалб қилиш, туризм ҳудудларининг меъморий режа ва дизайнини ишлаб чиқишда Туркия давлати тажрибасидан кенг фойдаланиш, бу соҳадаги Ўзбекистонга малакали мутахассисларни жалб қилиш масалалари муҳокама этилди. Бундан ташқари, Тошкент вилояти ҳокимлиги томонидан Туркия давлати билан ҳамкорлик қилишнинг асосий йўналишлари белгилаб олинди. Ушбу йўналишларга қуйидагилар киради:

1. Эко-туризм, Этнографик туризм, Зиёрат туризми, Саноат туризми, Спорт туризми, Қишки туризм, Тиббий туризм, Ов туризми, Гастрономик туризм ва Бадиий-маданий туризмларни ташкил этиш ва кенгайтириш; 

2. Бундан ташқари, Ўзбекистон Республикаси Президентининг 2017 йил 5 декабрдаги ПФ-5273-сонли фармонига асосан, Бўстонлиқ туманидан “Чимён ва Чорвоқ” рекрацион зонасида “Чорвоқ” эркин туристик зонасини ташкил этиш, мазкур зонада туризм инфратузилма объектларини жойлаштириш бўйича инвесторларни ва мутахассисларни жалб қилиш, барпо этиладиган объектлар бўйича инвестиция таклифларини ишлаб чиқиш бўйича ҳамкорликни йўлга қўйиш масалалари келишиб олинди.