ОАВ Порошенконинг Россиядаги бизнеси ҳақида маълумот берди

Украина президенти Пётр Порошенко Россияда нафақат Липецкдаги Roshen қандолат фабрикаси, балки бошқа корхоналарга ҳам эгалик қилган. Бу ҳақда Украинанинг «1+1» телеканали суриштирувида айтилади.

Украинанинг «Вести» нашри хабарига кўра, Порошенко Липецк областида крахмал ишлаб чиқариш, шунингдек, ғалла етиштириш ва сотиш билан шуғулланувчи корхонага эгалик қилган. Таъкидланишича, 2015 йилда бизнес Украина президентига 700 минг доллар миқдорида даромад келтирган.

Суриштирувда айтилишича, корхоналар сотилмаган, бизнес билан боғлиқ бўлган юридик шахслар эса ҳамон фаолият кўрсатмоқда.

Украина президенти маъмуриятидан маълум қилишларича, Порошенко Россияда бизнес билан шуғулланмайди.