Саудия Арабистонида 30 йиллик тақиқловдан кейин кинотеатрларга лицензия берила бошланди

Фото: РИА Новости / Александр Юрьев

Саудия Арабистони маданият ва ахборот вазирлиги 1 март кунидан катта экранда кино намойиш қилишга 30 йиллик тақиқловдан кейин кинотеатрларни бошқаришга лицензия бера бошлади.

Саудия Арабистонида кинотеатрлар 1980-йиллар бошида тақиқланган. Қиролликда яшовчилар кино кўргани асосан қўшни Баҳрайнга борганлар.

“Саудия Арабистонида кинотеатрлар фаолиятини тиклаш учун лицензиялар бериш шартлари охирига етказилди. Лицензиялар бериш жараёни дарҳол бошланади”, дейилган вазирлик сайтида.

2030 йилгача қиролликда 300 дан кўпроқ кинотеатрлар тармоғи ишлаши кутилмоқда. Уларда 2 мингдан кўпроқ экранда кенг омма учун фильмлар намойиш қилинади. Фильмлар мамлакатдаги маънавий қадриятларни бузмаслик учун цензурадан ўтказилади.