Нигерияда ўта хавфли Ласса безгаги тарқалмоқда

Нигерияда йил бошидан бери Ласса безгаги авж олмоқда, деб хабар беради «Би-би-си».

Ласса безгаги – ўлимга олиб келувчи касаллик бўлиб, эпидемияни чақириши мумкин, ҳамда айни дамда унга қарши вакцина йўқ. Бу чуқур вирусли геморрагик хасталик саналиб, у турли ички аъзоларга зарар етказиши ҳамда қон томирларни бузиши мумкин. Баъзи ҳолатларда касаллик Эболага ҳам ўхшаб кетади – бурун, оғиз ва тананинг бошқа жойларидан қон кетади.

Таъкидланишича, касалликнинг ҳозирги тарқалиши кўлами ва тезлиги бўйича аввал ҳеч қачон кузатилмаган.

Тахминий ҳисоб-китобларга кўра, вирус туфайли тахминан 90 киши ҳалок бўлди. Нигерияда январь ойидан бери Ласса безгагига чалинганлик бўйича 1000 дан ортиқ шубҳали ҳолат аниқланди, улардан 317 таси тасдиқланди.