Россияда Ан-148 самолётлари парвозлари тўхтатилди

Ространснадзор Россиянинг барча авиакомпанияларига Ан-148 самолётларида парвоз қилишни тўхтатишни буюрди.

Ространснадзор раҳбари Виктор Басаргиннинг айтишича, бундай қарор “Саратовские авиалинии” компаниясининг режадан ташқари текширувидан кейин қабул қилинган. 

11 февралда “Саратовские авиалинии” компаниясининг Москвадан Орска рейс амалга ошираётган Ан-148 самолёти Москва вилоятида фалокатга учраган. Самолёт бортида 65 йўловчи ва экпажнинг 6 аъзоси бўлган. Уларнинг барчаси ҳалок бўлган.

Фалокатдан кейин “Саратовские авиалинии” Ан-148 самолётлари эксплуатациясини тўхтатиб қўйган. 16 февралда эса авиакомпания Ан-148 парвозлари кучайтирилган экипажлар билан тикланганини маълум қилган. Режадан ташқари текширув ҳеч қандай қоидабузарликларни аниқламаган. 

2018 йил бошига Россияда 30 га яқин Ан-148 самолёти фойдаланишда бўлган. Бу самолётлардан 12 таси Россия мудофаа вазирлиги ва 2 таси фавқулодда вазият вазирлигига тегишли. Ушбу самолёт шунингдек “Ангара” авиакомпаниясида ва “Россия” махсус парвоз отрядида мавжуд.