Россияда интернет орқали харид ҳажми 1 трлн рублдан ошиб кетди

Россияда интернет-савдо бозори 2017 йилда 13 фоизга ошиб, 1,04 трлн рублни ташкил қилди. Бу ҳақда Интернет-савдо компаниялари уюшмасида (АКИТ) маълум қилинган. Бироқ бу натижа уюшманинг умидларини оқлай олмади, у бозор 25 фоизга ўсиб, 1,15 трлн рублни ташкил қилишини кутганди.

“Биз каттароқ натижа кутгандик. Ўсиш 2 марта секинлашган”, деб айтган АКИТ президенти Алексей Фёдоров. У ўсиш секинлашганини 2017 йилда россияликларнинг харид қилиш қобилияти 9 фоизга камайгани билан тушунтирган. 

Уюшма 2018 йилда интернет-савдо бозори ҳажми 1,25 трлн рублга етишини кутмоқда.

2017 йилда россияликлар хорижий интернет-дўконларда 374,3 млрд рубл сарфлашган, бу эса 2016 йилга нисбатан 24 фоиз кўпроқ бўлган. Хорижий дўконларга россияликларнинг барча онлайн-харидларининг 36 фоизи тўғри келган.

Хорижий харидларнинг 91 фоизи Хитойга тўғри келган. Бу борада Европа Иттифоқи улуши 3 фоизни, АҚШники 2 фоизни ташкил қилган.  

Россияликларнинг хорижий интернет-дўконлардаги аксарият харидлари қиймати бож тўланмайдиган сумма – 22 евродан ошмайди. Бундай харидларга транзакцияларнинг 61,4 фоизи, 22 евродан 55 еврогача буюртмаларга 22,2 фоизи, 50 евродан 150 еврогача харидларга 11,6 фоизи тўғри келган.

Айни вақтда дунёдаги энг йирик электрон савдо бозори Хитой ҳисобланади. 2017 йилда Хитойнинг интернет-савдо бозори 32 фоизга ошиб, 1,15 трлн доллардан кўпроқни ташкил қилган. Бу борада 2-ўрин АҚШга тегишли, 2017 йилда унинг интернет-савдо бозори ҳажми 455 млрд долларни ташкил қилган.