Эрдўған Трамп ва Путин билан Суриядаги вазиятни муҳокама қилди

Туркия президенти Ражаб Тоййиб Эрдўған Россия ва АҚШ етакчилари билан телефон орқали мулоқот қилганини маълум қилди.

“Сурияда яқин орада тинчликка эришиш учун қабул қилиш мумкин бўлган қадамлар борасида батафсил суҳбат бўлиб ўтди. Шу билан бирга Туркия минтақада қарама-қаршиликнинг хато эканлигини таъкидлайди. Анқара тинчликни таъминлаш ва гуманитар инқирознинг кескинлашиши олдини олишга чақирди”, деб айтган Эрдўған.

Туркия етакчиси Сурияда нафақат кимёвий қурол қўлланиши, балки оддий қуроллар қўлланишига ҳам эътибор қаратишга чақирган.  

“Суриядаги ихтилоф қурбонларининг кўп қисми тақиқланган қурол турларидан ҳалок бўлмаган. Кимёвий ҳужумлар пасткаш жиноятдир. Бироқ бочкали бомбалар қўлланишини ҳам унутмаслик керак, ундан кексалар, аёллар ва болалар ҳалок бўлмоқда. Шуларни ҳисобга олиб, Туркия Россия ва айниқса АҚШ бошчилигидаги коалицияни Суриядаги қуролланиш масаласига алоҳида зийраклик билан муносабатда бўлишга чақиради”, деб таъкидлаб ўтган Эрдўған.