Гвардиола учун имкон. Ҳафта ўйинлари анонси

Бу ҳафта дам олиш кунлари аввалгилардан ҳам қизиқ бўлади. Бир қатор қизиқарли дербилар ва Чемпионлар лигаси йўлланмаси учун ўзаро курашлар билан бирга, Франция, Нидерландия чемпионатларида расман ғолиб аниқланиши, Туркия, Португалия каби биринчиликларда эса, яққол фаворитни билиб олишимиз мумкин бўлади. Келинг, бир бошдан.

БАЙЕР – АЙНТРАХТ (14 апрель, 18:30)

Кучли тўртлик учун ҳақиқий кураш Бундеслигада кечмоқда ва биз деярли ҳар ҳафта бу гапни айтишдан чарчамаяпмиз. Чунки ҳар турда у ерда шаклланган ўзига хос Топ-7 йўлланма учун ўзаро курашишмоқда.

Ҳар икки жамоа ўтган турда асосий рақибларга қарши ўйнашди. Франкфуртликлар дуранг қайд этишган бўлса, «Байер» сафарда чиройли ғалабага эришди ва кучли тўртликка кириб олди.

«Байер»да 48 очко, «Айнтрахт» 46 очко билан бешинчи ўринда бормоқда. Шунингдек, «Лейпциг»да ҳам 46 очко мавжуд. Демак, «Байер» агар ғалаба қозонса, ушбу курашда ўз имкониятини янада яхшилаб олиши мумкин. 

БАРСЕЛОНА – ВАЛЕНСИЯ (14 апрель, 19:15)

«Барселона» чемпионлик, «Валенсия» эса кучли тўртликка кириш масаласини деярли ҳал қилган бўлишса-да, бу ўйин жуда яхши афиша, шунингдек, бу жуфтликнинг биринчи даврадаги учрашуви ҳам қизиқ ўтганди.

Бундан ташқари, «Валенсия» ҳозирда «Реал»дан 1 очко олдинда бормоқда ва якунда мадридликлардан юқори ўринни эгаллаш ҳам мухлислар учун ёқимли.

«Барселона» эса Римдаги даҳшатдан сўнг ўзига келиб олиши, энг муҳими, мухлислар олдида ўзини оқлаб олиши керак. Тўғри, ҳеч қандай ғалаба Чемпионлар Лигаси ярим финалини қайтариб бера олмайди, лекин шундай бўлса ҳам, мухлис халқи кечиримли, чиройли ўйин бўлиши шарт.

Бошқа тарафдан, икки ойдан кейин жаҳон чемпионати бошланади. Мавсумнинг асосий мусобақасидан чиқиб кетган «Барселона» етакчилари энди айнан ўша мусобақа ҳақида қайғуришни бошлашлари ва имкон қадар жароҳат олмасликка интилишлари ҳам мумкин.

ТОТТЕНҲЕМ – МАНЧЕСТЕР СИТИ (14 апрель, 23:45)

«Манчестер Сити» ўтган турда чемпионликни расман ҳал қилиш имкониятини бой бериб қўйди ва энди Пеп Гвардиола жамоаси қолган 6 ўйиндан 2тасини ўз фойдасига ҳал қилишига тўғри келади. Бунга вақт ҳам, ҳафсала ҳам етарли, зеро «шаҳарликлар» сешанба куни «Ливерпуль»дан мағлубиятга учраб, Чемпионлар Лигасидаги курашни тўхтатди.

Атиги ўн кун олдин Пеп Гвардиола Англияни маҳв этгани ҳақидаги ҳар қандай мулоҳаза тасдиқ билан қувватланган бўлса, эндиликда, мавсум охирига келиб, бироз бошқача кайфият юзага келди. Бир ҳафта ичида «Манчестер Сити» уч бора мағлубиятга учради ва ҳаммаси инглиз клубларидан. Агар ўз майдонида жуда кучли ўйнайдиган «Тоттенҳэм» бу анъанани давом эттирса, «Сити» жуда оғир зарбани қабул қилган бўлади.

«Тоттенҳэм», айниқса, Почеттино билан бу ишга қодир, чунки аргентиналик мураббий қўл остида лондонликлар икки йил «Сити» учун ўта ноқулай рақиб ҳисобланиб келди ва 4 ўйиндан учтасини ўз фойдаларига ҳал қилиб, бир марта дуранг ўйнаганди. Фақат декабрь ойида «Этиҳад»да бўлиб ўтган ўйинда мезбонлар осонлик билан (4:1) ғалаба қозонди.

Турнир нуқтаи назаридан, ўйинни у даражада ҳаёт-мамот дейиш қийин. Фақат «Манчестер Сити»нинг чемпионлигини бироз тенглаштириши ёки «Тоттенҳэм»нинг кучли тўртлик учун курашда амалий томондан ғолиб қилиши мумкин. «Тоттенҳэм» ҳозирда «Челси»дан 10 очко олдинда бормоқда, агар бу турдан кейин ҳам фарқ қисқармаса, «Челси»ни бемалол Европа Лигасига кузатсак бўлади.

МИЛАН – НАПОЛИ (15 апрель, 18:00)

А Серияда ажойиб серия намойиш этиб, ҳатто кучли тўртликка яқинлашган «Милан» бош мураббий Гаттузо билан янги шартнома тузишни бошлади ҳамки, ишлар чаппасига кетди. Миланликлар уч ўйиндан бери ғалаба қозона олишмаяпти – «Ювентус» ва «Интер» билан ўйинларни тушунса бўлади, лекин ўтган турда «Сассуоло» билан зўрға дурангга эришишни оқлаш қийин.

Бу сафар «Милан» энди «Наполи»ни тўхтатишга уриниб кўради. Меҳмонларнинг очко йўқотиши «Милан»нинг ашаддий рақиби «Ювентус» учун чемпионлик эшикларини очишини унутмаслик керак. 

ШАЛЬКЕ – БОРУССИЯ ДОРТМУНД (15 апрель, 18:30)

Германиянинг ҳам ўз дербилари бор ва улардан энг асосийси Рур дербисидир. Бу сафар бу ўйин турнир нуқтаи назаридан ҳам интрига тусини олган. Ҳар икки жамоа кучли тўртлик учун курашмоқда.

Ҳозир «Шальке» ва «Боруссия» мос равишда 52 ва 51 очкодан тўплаб, иккинчи ва учинчи ўринларни эгаллаб турган бўлишса-да, юқорида тилга олинган нариги жамоалар ҳам узоқда эмас, яъни мағлубиятга учраган тараф сўнгги турлар учун вазиятни кескинлаштириб юбориши мумкин.

Албатта, бу фурсатда жамоалар ўртасида бўлиб ўтган биринчи даврадаги ўйинни ҳам эслаб ўтмасак бўлмайди. Ўшанда қаторасига бир неча ўйинда ғалаба қозона олмаган «Боруссия» дербининг илк 25 дақиқасида «Шальке» дарвозасига 4 гол урган ва ўзига хос тарзда «қайтиш» қилмоқчи эканини намойиш этганди. Аммо иккинчи бўлимда «Шальке» ўйинда туб бурилиш ясаб, сўнгги дақиқалардаги гол билан ҳисобни 4:4 қилишнинг уддасидан чиққан. 

ПСВ – АЯКС (15 апрель, 19:45)

Эредивизиядаги охирги 20 мавсумнинг 16тасида шу жамоалардан бири чемпион бўлган. Ажойиб футбол мактаби, ўзига хос футбол услуби билан мақтана оладиган, бир қатор топ юлдузлар Европага кириб келишларида илк бекат бўлган бу жамоалар бу сафар ҳам Нидерландия чемпионати турнир жадвалини бошқариб келмоқда.

30 турдан кейин пешқадам «ПСВ» билан энг яқин таъқибчи «Аякс» ўртасидаги фарқ 7 очкони ташкил қилмоқда. Демак, бу ўйинда мезбонлар ғалаба қозонса, фарқ 10 очкога етади ва расман Эредивизия чемпиони номи маълум бўлади. 

ГАЛАТАСАРОЙ – ИСТАНБУЛ БАШАКШЕҲИР (15 апрель, 21:00)

Шу пайтгача биз Истанбул дербиси, умуман Туркия чемпионати деганда, «Галатасарой», «Фенербаҳче» ва «Бешиктош»ни тушунардик. Лекин сўнгги 3-4 йилда «Истанбул» ҳам катта қадамлар ташлади. Жамоа аввалига Европа Лигаси зонасида мавсумни якунлаган бўлса, ўтган йили чемпионлик учун муносиб курашди. Бу сафар эса, Абдулла Овчи шогирдлари мавсум тугашига 6 тур қолганда турнир жадвалида етакчилик қилмоқда.

«Галатасарой» рақибидан 2 очко ортда қолиб, иккинчи ўринни эгаллаб туришибди. Демак бу ўйинни нафақат дерби, балки чемпионлик матчи деб ҳам аташ мумкин. Ғалаба мезбонларни мусобақа пешқадамига айланади, акс ҳолда, «Истанбул» тарихда илк бор Туркия чемпиони бўлиш учун яна бир дадил одим ташлаган бўлади.

Аслида, «Истанбул» номи кўпчилик учун янги бўлса-да, жамоа таркибида нафақат Туркия, балки Европа миқёсидаги юлдузлар тўп суради. Гаэл Клиши, Мануэл Де Коста, Аурелен Шежжу, Эмре Белезўғли, Гўкҳан Инлер, Арда Туран, Эларио Элиа, Эммануэл Адабайор – бу футболчиларнинг маҳорати ҳам, тажрибаси ҳам Туркиядаги гигемон учликни ағдаришга бемалол етади. 

БЕНФИКА – ПОРТУ (15 апрель, 22:00)

Португалия футболидаги Эл Классико. Бу сафарги ўйин шунингдек, чемпионлик масаласига ҳам жиддий таъсир қилади.

2018 йилда умуман мағлубият нималигини билмай келаётган «Бенфика» 9 ўйиндан буён фақат ғалаба қозонмоқда. Натижада, ўтган турда «Порту»ни қувиб ўтиб, турнир жадвалида пешқадам бўлиб олди. «Порту» эса, бироз беқарор ўйин ўтказмоқда, хусусан, сафардаги сўнгги 2 ўйинда жамоа имкониятни бой берди.

Демак, жамоалар ўртасидаги фарқ атиги 1 очко, мавсум тугашига атиги 6 тур қолганини эътиборга олганда, бу ўйин ғолиби якунда мамлакат чемпиони бўлиши мумкин.

ЛАЦИО – РОМА (15 апрель, 23:45)

Шу абзацни ўрнингиздан туриб ўқишингизни илтимос қиламиз – «Рома»га қарсаклар. Римликлар ҳеч ким кутмаган жойда, ҳеч ким кутмаган пайтда Чемпионлар Лигасидаги энг катта ўйинлардан бирини намойиш қилиб беришди.

Байрам қилишга вақт йўқ. Катта эҳтимол билан энди «Рома» учун севимли турнирга айланадиган Чемпионлар Лигаси йўлланмасини қўлга киритиш учун ушбу дербида ҳам ғалаба қозониш шарт.

Ҳар икки жамоа 60 очко билан 3-4 ўринларни эгаллаб туришибди, лекин 5-ўриндаги «Интер»да атиги 1 очко кам холос. Яъни, ютқазган жамоа ушбу турни кучли тўртликдан ташқарида тугатиши мумкин.

ПСЖ – МОНАКО (16 апрель, 23:55)

Кўпчиликнинг эсидан чиқиб кетгандир, «ПСЖ» деган жамоа ҳалиям бор ва улар мавсумдаги иккинчи совринини қўлга киритишга яқин турибди. Бу сафар ҳам рақиб - «Монако». Икки ҳафта олдин бу жамоалар Франция Лига кубоги финалида тўқнаш келди ва парижликлар осонлик билан ғалаба қозониб, қаторасига тўртинчи марта ушбу кубок соҳиби бўлганди.

Бугунги ўйиннинг ўзига хослиги – «ПСЖ» агар ғалаба қозонса, кучли бешликда иккинчи бўлиб чемпионлик масаласини расман ҳал қилади. Ҳозир бу жамоалар ўртасидаги фарқ 14 очкони ташкил қилмоқда, демак мезбонларнинг ғалабаси бу фарқни 17тага олиб чиқади. Мавсум тугашига 5 тур қолганда бу фарқни йўққа чиқариш назарий томондан ҳам имконсиз.

БОШҚА ЎЙИНЛАР

14 АПРЕЛЬ: «Саутҳэмптон» – ЧЕЛСИ (16:30), «ЛИВЕРПУЛЬ» – «Борнмут» (21:30) «Аталанта» – «ИНТЕР» (23:45)

15 АПРЕЛЬ: «Ньюкасл» – «АРСЕНАЛ» (17:30), «АТЛЕТИКО» – «Леванте» (19:15), «МАНЧЕСТЕР ЮНАЙТЕД» – «Вест Бромвич» (20:00), «ЮВЕНТУС» – «Сампдория» (21:00), «Малага» – «РЕАЛ» (23:45)