Меҳмонхоналар билан боғлиқ муаммоларни бартараф этишда Туркия тажрибасидан фойдаланилади

Ўзбекистонда туризмни ривожлантириш йўлидаги асосий тўсиқлардан  бири - меҳмонхоналар етишмовчилиги муаммосини бартараф этишда Туркия тажрибаси қўлланилади. KUN.UZ мухбири 30 апрель куни Туризмни ривожлантириш давлат қўмитаси ва PR-маркази ташаббуси билан ўтказилган тадбирда берилган маълумотларга асосланиб, шу ҳақида хабар берди.

Мутахассисларнинг сўзларига кўра, меҳмонхоналар билан боғлиқ муаммоларни ҳал қилишда Туркия тажрибасини қўллаш учун қонунчиликка айрим ўзгартиришлар киритиш керак бўлади. Тадбирда туризмни ривожлантиришда Туркия тажрибасини ўрганиш учун туркиялик эксперт Содиқ Бадак билан шартнома тузилгани, айни дамда у билан бирга Туризмни ривожлантириш стратегиясини ишлаб чиқилаётгани, яқин ойларда у тақдим этилиши айтилди.

Туркия бош омбудсмени Шереф Малкоч бу борада шундай дейди:

Туркия 40 йилдан бери туризмни ривожлантириш билан шуғулланади. Ўзбекистонда меҳмонхоналарга эҳтиёж борлигини кўряпмиз. Мана бугунги кунга келиб Ўзбекистонга чет эллик сармоячилар ва ишбилармонларга бу йўналишда қатор имтиёзлар яратилаётган экан, баъзи ҳуқуқий ва ташкилий жараёнлар ҳал қилинганидан кейин туркиялик ишбилармонлар бу ерда меҳмонхоналар қурилиши, туризм инфратузилмасини яхшилашга бел боғлайди, улар бунга шай.

Бундан аввал Туризмни ривожлантириш давлат қўмитаси раиси Азиз Абдуҳакимов ҳам Ўзбекистон Президенти Шавкат Мирзиёевнинг Facebook саҳифаси орқали узатилган интервьюсида Ўзбекистонда туристик инфратузилма борасида маълум бир камчиликларга дуч келинаётгани, яқин 1,5-3 йилда ҳал қилиш керак бўлган масала - жойлашув воситаларини кескин кўпайтириш эканини таъкидлаган эди.

Биз туристлар оқими ошиб бораётганини кўриб, бу бизнесга киришга ҳаракат қилаётган хўжалик субъектларини кўряпмиз. Улар меҳмонхоналар, хостеллар, меҳмонхона уйларини қуришмоқчи. Бу йўналишда Туризмни ривожлантириш давлат қўмитаси томонидан қатор рағбатлантирувчи чоралар ишлаб чиқилган. Чет эллик сармоячилар биздан биринчи бўлиб улар қўлга киритаётган ер участкалари уларга хусусий мулк сифатида расмийлаштирилишига доир имтиёзни сўрашади. Айни дамда биз ҳукуматга шу жумладан меҳмонхона қурилиши учун бериладиган ер хусусий бўлишини кўзда тутувчи ҳужжатлар пакетини тақдим қиляпмиз. Яна бир имтиёз эса импорт жиҳозларни (мебеллар, қурилиш материалларини) ҳеч қандай чекловларсиз олиб киришни кўзда тутади. Худди шу ҳужжат билан франшизаларни жалб қилаётган ишбилармонларга ҳам  имтиёзлар яратмоқчимиз. Шу муносабат билан франшизаларни жалб қилувчи хўжалик субъектлари харажатларининг бир қисми қандайдир тарзда компенсация қилиниши режалаштирилган.

Туркияда 1980-1990-йилларда меҳмонхоналар сонини кескин ошириш йўлида амалга оширилган чоралардан бири - меҳмонхона қурилиши ва ишга тушгандан кейин харажатларнинг бир қисми компенсация қилиниши. Биз ҳам шундай схема - Ўзбекистонда янги меҳмонхоналар қурилишини рағбатлантириш устида бош қотиряпмиз.

Ҳуқуқий майдон ҳақида гапирадиган бўлсак, бугунги кунда бизда Туризм тўғрисидаги янги қонун лойиҳаси тайёрланган. Бу қонунда туризм мамлакат иқтисодиётининг асосий йўналишларидан бирига айланиши учун  ишбилармонлар фаолиятига янада кўпроқ эркинлик ва қўшимча рағбат берувчи янги нормалар, янги қоидалар ишлаб чиқилади.