Жанни Инфантино мини жаҳон чемпионати ўтказишни режалаштирмоқда – Reuters

ФИФА президенти Жанни Инфантино халқаро футбол мусобақаларини тубдан модернизация қилишни режалаштирмоқда.    

Reuters ахборот агентлигининг маълум қилишича, Инфантинонинг режасига Конфедерациялар кубоги кирмайди. Инфантинонинг таклифига кўра, бу мусобақа ҳар 2 йилда бир марта тоқ йилларда ўтказиладиган ва 8 та жамоа иштирок этадиган янги жаҳон чемпионати билан ўзгартирилади. Мусобақанинг лойиҳавий номи “Саккизлик финали” бўлиб, унинг доирасида илк мусобақа 2021 йилнинг октябрь-ноябрь ойларида ўтказилмоқчи.

Янги жаҳон чемпионати терма жамоаларнинг ўртоқлик учрашувлари ўрнини эгаллашга чорланган Миллатлар лигасининг кульминацияси бўлади. Бироқ ҳозирча Инфантинонинг ғоясини Миллатлар лигасида фақат Европа жамоалари иштирок этиши билан қандай уйғунлаштириш мумкинлиги ноаниқ бўлиб қолмоқда.

Инфантино билдираётган яна бир таклиф клублар ўртасида 24 та жамоа иштирок этадиган жаҳон кубогини ташкил этиш ҳисобланади, уни ҳам 2021 йилда бошлаш режалаштирилган.

“Саккизлик финали” Европа чемпионати, Африка миллатлари кубоги, Копа Америка ва жаҳон чемпионатига саралаш мусобақалари ўтказилишига халақит қилмайди. 

Инфантинонинг яна бир йирик ислоҳотларидан бири жаҳон чемпионатида иштирок этувчи жамоалар сонини 32 тадан 48 тагача ошириш ҳисобланади.

Инфантинонинг “Саккизлик финали” бўйича таклифини ФИФА кенгаши маъқуллаши керак.