Помпео етакчилар саммитини муҳокама қилиб, КХДРдан америкалик тутқунлар билан қайтмоқда

АҚШ давлат котиби Майк Помпео айни дамда ўтказилишига ҳозирлик кўрилаётган АҚШ-КХДР саммити бир кун давом этишини билдириб, унинг аниқ ўтказилиш санасига яқин орада аниқлик киритилишини айтиб ўтди, деб ёзишмоқда Америка оммавий ахборот воситалари.

КХДР пойтахти Пёнгянгга қилган ташрифидан сўнг АҚШга қайтаётган Помпео АҚШ президенти Дональд Трамп ва Шимолий Корея етакчиси Ким Чен Иннинг учрашув санаси «бир неча кун ичида» эълон қилинишини айтиб ўтди. Унинг таъкидлашича, учрашув бир кунда бўлиб ўтади.

Давлат котиби ўз Твиттерида Ким Чен Ин билан учрашуви сермаҳсул бўлганини таъкидлаб ўтган.

«Биз Ким Чен Ин билан сермаҳсул учрашувлар ўтказдик ва мулоқотларда тараққиётга эришдик», — деб ёзган Помпео.

АҚШ Корея яриморолида тинчлик ҳукмрон бўлиши учун Пёнгянг билан ҳамкорлик қилишга тайёр. Reuters агентлигига кўра, бу ҳақда бугун АҚШ давлат котиби Майкл Помпео Корея меҳнат партияси (КМП) нинг ягона фронт бўлими мудири Ким Ёнг Чёл билан учрашуви давомида айтиб ўтган. Эслатиб ўтамиз, у КХДР пойтахтига КХДР ва АҚШ етакчиларининг саммитини ўтказиш масалаларини муҳокама этиш учун келган эди.

«Ўнлаб йиллар мобайнида бизлар душман эдик. Айни пайтда мавжуд чигал вазиятни ечиш, жаҳон учун таҳдидни йўққа чиқариш ва давлатингизга унинг халқи муносиб бўлган имкониятларни тақдим этиш учун биргаликда ишлашимиз мумкинлигидан умид қилмоқдамиз», — дея давлат котиби сўзларини келтирмоқда агентлик.

Учрашув мобайнида томонлар ўртасида «ҳозирча тўсиқлар кўплиги»ни айтиб ўтиб, икки етакчиларнинг саммити муваффақиятли якунланишидан умид қилаётганини билдирди.

Ким Ёнг Чёл ўз навбатида «АҚШнинг Корея яриморолида тинчлик ўрнатилишида катта роль ўйнаши»дан умид қилаётганини айтиб ўтди. Бунга жавобан Помпео Вашингтон Пёнгянг билан ҳамкорлик қилишда «айнан шу нарсага» эришишга ҳаракат қилишини билдирди.

The Washington Post газетасининг ёзишича, КМПнинг ягона фронт бўлими мудири КХДР шу ондан бошлаб «иқтисодий ривожланишга ўз эътиборини қаратишни бошлайди». Ким Ёнг Чёл сўнгги пайтларда мулоқот учун пайдо бўлган қулай шароит КХДРга нисбатан «қўлланилган ташқи санкциялар оқибати эмаслиги»ни қўшимча қилди.

АҚШ Давлат котиби Майкл Помпео КХДРдаги тутқунликдан озод қилинган уч ватандоши билан АҚШга қайтмоқда. Бу ҳақда АҚШ президенти Дональд Трамп ўз Твиттерида ёзган.

«Давлат Котиби майкл Помпео Шимолий Кореядан барча учрашишни интизорлик билан кутаётган уч жентльмен билан қайтиб, уйи томон парвоз қилмоқда, уларнинг кўриниши яхши», — деб ёзганТрамп.У самолётни Мэриленд штатидаги Вашингтонга яқин Эндрюс авиабазасида кутиб олишини қўшимча қилган.

«Мен уларни кутиб олиш учун у ерга чиқаман. Жуда ҳам ҳаяжонланаяпман», — деган АҚШ президенти.

Yonhap News агентлигининг ёзишича, КХДРда қамоққа олинган, жосуслик ва душманона ҳаракатларда айбланган АҚШ фуқаролари апрель ойида қамоқ лагеридан Пёнгянг яқинидаги меҳмонхоналардан бирига ўтказилган эди. Уларни озод этиш борасидаги музокаралар КХДРда АҚШ манфаатларини ифода этувчи Швеция воситачилигида ўтказилган.