АҚШнинг Шимолий Кореядаги ҳокимиятни ўзгартириш мақсади йўқ – Помпео 

АҚШга Шимолий Корея ҳокимиятини ўзгартириш эмас, балки узоқ муддатли келишувлар зарур, деб айтди АҚШ давлат котиби Майк Помпео Fox News’га берган интервьюсида. 

Помпеонинг айтишича, АҚШ президенти Дональд Трамп Шимолий Корея етакчиси Ким Чен Инни ўзгартиришга эмас, “узоқ муддатли келишувга” интилади.

“Умид қиламизки, Ким стратегик ўзгаришларни истайди, президент Трамп эса бунда унга ёрдам беришга тайёр”, деб айтган Шимолий Кореяга иккинчи марта ташриф буюрган Помпео. 

Унинг тан олишича, АҚШга келишув ҳақиқатга айланиши учун Шимолий Корея каби ён босишига тўғри келади. “Агар биз тарихий натижага эриша олсак, иккала томон ҳам бирдек ўйинга киришишига тўғри келади”, деб қўшимча қилган Помпео.

Аввалроқ Трамп ва Ким Чен Ин 12 июнда Сингапурда учрашишлари ҳамда Шимолий Кореяни ядровий қуролсизлантиришни муҳокама қилишмоқчилиги маълум қилинганди.