Кубадаги авиаҳалокат қурбонлари сони 110 нафарга етди

Гавана аэропортида содир бўлган авиаҳалокат оқибатида ҳалок бўлганлар сони 110 нафарга етди, 3 киши жароҳат олган. Бу ҳақда The Gazette нашри маълум қилди.

Нашрнинг таъкидлашича, жароҳат олганларнинг аҳволи оғир. Авиаҳалокатда 5 бола ҳаётдан кўз юмган.

Шунингдек, ҳалок бўлганлар орасида 20 руҳоний бор. Уларнинг барчаси мамлакатнинг шарқий қисмидан бўлган. Маълум қилинишича, руҳонийлар Гаванадаги учрашувда бир неча кун бўлиб, уйга қайтаётган бўлганлар.

Ҳаммаси бўлиб самолётда экипаж билан бирга 113 киши бўлган. Аввалроқ самолёт қора қутиларидан бири аниқлангани маълум қилинганди. 

Гаванадан Ольгинга учаётган Boeing-737 Хосе Марти аэропортидан ҳавога кўтарилгандан бир неча дақиқа ўтиб ҳалокатга учраган. Самолёт 1979 йилда ишлаб чиқарилган бўлиб, эскилигига қарамай ишлаш учун барча рухсатларга эга бўлган.

Куба ҳукуматининг маълум қилишича, воқеа сабабларини аниқлаш учун синчков тергов ўтказилади.