ПФЛ футзал, аёллар ва ёшлар жамоаларига беэътибор клубларни жазолайди

Суперлига 12та клубининг ҳар бирида аёллар, футзал, ёшлар ва ўсмирлар жамоаси бўлиши шарт, деб ёзмоқда ПФЛ сайти.

Бу талабларни бажариш, осон эмас. Аммо Суперлига клублари мавсум аввалидаёқ бу талабни билган ва шу ишларни бажариш кафолатини берган. Шунга қарамай, айрим жамоалар футзалчиларга ёки энг кичик ёш жамоаларга эътиборни сусайтириб юборган. Бу борада ПФЛ шикоятларни оляпти.

Шундан келиб чиқиб, Профессионал футбол лигаси Суперлига клубларини расман огоҳлантиради. Шакли жиҳатидан бошқа-бошқа бўлишига қарамай, аёллар футболи ва футзал жамоалари ҳам клубнинг тенг ҳуқуқли аъзосидир. Шу қоида кимнингдир ёдидан кўтарилган бўлса, ўша жамоа жазога тортилади.

ПФЛ талаби ўзгармайди. Суперлига клублари асосий таркиб футболчиларига қандай эътибор қаратса, қолганлар ҳам шундай эътиборда бўлиши лозим. Ўз навбатида Про-Лига клублари ҳам ҳозирданоқ бу каби талаблар ҳақида бош қотириши шарт. Зеро бу талабларга жавоб бера олмайдиган клублар барибир Суперлигага қўйилмайди.