Диабетга чалинган оналарда болаларнинг аутизм билан туғилиш хавфи юқори бўлади

Калифорниялик педиатр ва неонатологлар ҳомиладор аёлларда диабетнинг уч туридан бири бўлган тақдирда боланинг аутистик тизими бузилиш хавфи ошишига доир хулосага келишди. Ярим миллионга яқин ҳомиладор аёллар маълумотларига асосланган натижалар Journal of American Medical Association (JAMA)да чоп этилди.

Тадқиқотда 1995-2012 йиллар оралиғида 28 ҳафтадан 44 ҳафтагача бўлган муддатда дунёга келган 416 425 бола қамраб олинди. Олимлар жараёнга аралашмай, шунчаки кузатган обсервацион тадқиқот қуйидагиларга асосланган: муаллифлар дастлаб ҳомиладорликнинг 26-ҳафтасида қандли диабетнинг бирор тури (биринчи турдаги, иккинчи турдаги ва гестацион диабет) мавжудлигини аниқлашган, сўнгра илк етти йилда болаларнинг аҳволини кузатишган. 

Натижалар рақамларда қуйидагича кўриниш олган: биринчи турдаги диабет - 621 ҳолат, иккинчи турдаги диабет - 9 453 ҳолат, гестацион диабет - 11 922 ҳолат. Шу билан бирга, 24 505 онада диабетнинг сўнгги тури кейинроқ ривожланган. 

5 827 болада аутистик спектрдаги турли бузилишлар қайд этилган. Маълум бўлишича, биринчи турдаги диабетга чалинган онадан туғилган ҳар 1000 боладан - 4.4 нафари, иккинчи турдаги диабетга чалинган ҳар 1000 онадан туғилган 3.6 нафар бола ҳамда гестацион диабетга йўлиққан онадан дунёга келган ҳар 1000 боланинг 2.9 нафари аутизм билан касалланган. Шунингдек кеч гестацион диабет ҳолатида (ҳомиладорликнинг 26 ҳафтасидан кейин) - 2.1 болада, диабетсиз эса атиги 1.8 нафар болада аутизм касаллиги қайд этилган. Муаллифлар ушбу феноменга изоҳ беришмаган, лекин мазкур тадқиқот диабетга чалинган оналарга янада кўпроқ эътибор қаратишга чорлайди.