Учувчиларнинг парвоз вақтида муштлашиб кетиши туфайли авиаҳалокат юз беришига бир бахя қолди

Ироқнинг Iraqi Airways авиакомпанияси учувчилари бортида 150 йўловчи бўлган самолётнинг парвози вақтида бортда юз берган муштлашув туфайли ишдан четлатилди. Бу ҳақда Al Sumaria хабар бермоқда.

Йўловчиларнинг хабар беришича, учувчиларни хавфсизлик хизмати ходимлари ажратиб қўйишга мажбур бўлган. Шунингдек, таъкидланишича, муштлашув чоғида кабинанинг бир қисмига жиддий зиён етган. Можарога аслида нима сабаб бўлгани хабар қилинмаяпти.

Самолёт 11,2 километрлик баландликда бўлган. Хабар берилишича, муштлашув авиаҳалокатга ҳам олиб келиши мумкин эди.

Учувчилар жиддий жаримага тортилиши мумкин. Ҳозирги пайтда ҳар икки учувчи парвозлардан четлатилди, Транспорт вазирлиги суриштирув ишларини бошлади.