Хитой ривожланаётган давлатларни қўллаб-қувватлашда давом этишини маълум қилди

Хитой қай даражада кучайишидан қатъи назар бошқа ривожланаётган давлатларни қўллаб-қувватлашда давом этади, деди ХХР раиси Си Цзиньпин.

"Хитой қай даражада кучаймасин, биз ривожланаётган дунё ҳақида унутмаймиз. Биз бундан буён ҳам ривожланаётган бошқа давлатларнинг тараққий этишини қўллаб-қувватлашда ва сизлар билан (Африка мамлакатлари — таҳр.) ҳамкорлик қилишда давом этамиз ", — деди у БРИКС етакчилари учрашувида.

У Хитой умумий ўсиш ва ривожланиш йўлида ривожланаётган давлатлар билан ҳамкорлик қилишини билдирди.

ХХР раисининг қайд этишича, Хитой ва Африка мамлакатлари аҳил биродар, ҳамкор ва дўстлардир.

"Ҳамкорликдаги саъй-ҳаракатларимиз туфайли Хитой-Африка умумий стратегик ҳамкорлиги ривожланишда давом этмоқда. Биз юз миллионлаб инсонлар манфаатлари йўлида қатор соҳаларни қамраб оладиган умумий ҳамкорликни ташкил этамиз", — деб қўшиб қўйди у.