WhatsApp компаниялардан мижозларига хабар жўнатгани учун пул олади

WhatsApp мессенжери фойдаланувчиларга реклама ва хабарлар жўнатгани учун бизнес фойдаланувчилардан пул олишни бошлайди. Бу ҳақда Reuters компания баёнотига асосланиб хабар берди.  

Битта хабар нархи мамлакатига қараб 0,5 центдан 9 центгача бўлади.  

WhatsApp орқали хабар жўнатиш SMS жўнатишдан кўра қимматроққа тушади, деб қайд этди Reuters. Пуллик хизмат ҳақида батафсил маълумот ошкор этилмаяпти — WhatsApp ҳозирча WhatsApp Business дастурини синовдан ўтказмоқда ва ариза берган компанияларни бу дастурга уламоқда. WhatsApp блогида ёзилишича, «айрим» хабарлар пуллик бўлади. 

WhatsApp компаниялар учун иловасини синовдан ўтказаётгани ҳақида илк бор 2017 йил сентябрда хабар қилинганди. Ўшанда TechCrunch нашри мессенжер эгаси бўлган Facebook кичик бизнесга бепул хизмат кўрсатишини ва йирик корпорациялардан эса пул олишини тахмин қилганди.