ОАВ: Хитой ўзининг биринчи гипертовушли қурилмасини муваффақиятли синовдан ўтказди

Хитой аэрокосмик фанлар ва технологиялар корпорацияси ХХР тарихида биринчи марта соатига 7,1 минг километр тезликда уча оладиган Xingkong-2 гипертовушли учувчи қурилмасини синовдан муваффақиятли ўтказди. Бу ҳақда Global Times газетаси хабар қилди.
Хитой Аэрокосмик аэродинамика академияси мутахассислари томонидан ишлаб чиқарилган қурилма ХХР шимоли-ғарбидаги полигонлардан бирида синовдан ўтказилди. Ишлаб чиқарувчиларнинг айтишларича, парвоз вақтида қурилма рақиб учун олдиндан аниқлаб бўлмайдиган траектория бўйича ҳаракатланган. Келажакда у жанговар каллаклар ташишда ҳамда ракетага қарши мудофаа тизимида қўлланилади.
Синовлар давомида қурилма 10 дақиқага яқин вақт ҳавода бўлган – бу вақт ичида у 30 километр баландликда қатор манёврларни бажарган ва мўлжалланган нуқтага қўнган. Қурилма яна бир нечта синовлардан ўтказилганидан сўнг Хитой халқ озодлик армиясига берилади.