«Хавфсиз пойтахт»: 45 нафар ҳайдовчи автомобилни маст ҳолда бошқарган

Кечки ва тунги вақтларда пойтахт йўлларида олиб борилаётган профилактик чора-тадбирлар натижасида йўл ҳаракати қоидаларини қўпол равишда бузаётган ҳайдовчилар аниқланиб, уларга нисбатан қонуний чоралар кўрилмоқда, деб хабар беради пойтахт ИИББ ахборот хизмати.

Жумладан, ўтган 5 куннинг айнан тунги вақтларида 45 нафар ҳайдовчи автомобильни маст ҳолда бошқаргани маълум бўлди. Улардан 25 нафари эса транспорт воситасини белгиланган тезлик меъёридан ошириб бошқаргани учун тўхтатилган эди.

4-9 август кунларининг тунги вақтларида жами бўлиб, 2 209 қоидабузарлар аниқланган. Улардан:

• 1 867 ҳайдовчи тегишли ҳужжатларсиз автомобиль бошқарган;
• 24 нафари светофорнинг қизил чироғида тўхтамаган;
• 108 киши йўл белгиларини инкор этган.

“Ҳурматли ҳайдовчи! Йўлларда ҳаракат қоидаларига риоя қилинг. Мастлик ва тезлик сизни сиз кутмаган манзилга олиб боришини унутманг! Ўзингиз ва яқинларингизга раҳм қилинг! Эҳтиёт бўлинг!” - дейилади хабарда.