Бухородаги коллежлар қайта ихтисослаштирилди ва қайта ташкил этилди

Бухоро давлат университети қошидаги 1-сонли академик лицей Бухоро озиқ-овқат саноати ва сервис касб-ҳунар коллежи этиб, университет қошидаги Компьютер ва ахборот технологиялари академик лицейи Бухоро телекоммуникация технологиялари ва сервис касб-ҳунар коллежи этиб қайта ихтисослаштирилди. Шунингдек, Бухоро маданият коллежи Бухоро ихтисослаштирилган маданият мактаб-интернати сифатида қайта ташкил этилди. Бу ҳақда «Kun.uz» манбаси хабар бермоқда.

Бухоро шаҳри Абу Ҳавс Кабир кўчасида жойлашган Бухоро ихтисослаштирилган маданият мактаб-интернатининг бино ва иншоотлари тегишли ҳудуди билан биргаликда Мир Араб ўрта махсус ислом билим юртига бепул берилган.

Бухоро шаҳри, Пиридастгир кўчаси, 6-уй манзилида жойлашган Бухоро озиқ-овқат саноати ва сервис касб-ҳунар коллежининг бино ва иншоотлари тегишли ҳудуди билан биргаликда Бухоро ихтисослаштирилган маданият мактаб-интернатига берилади.

Бухоро шаҳри, Алпомиш кўчаси, 1-уй манзилида жойлашган Бухоро телекоммуникация технологиялари ва сервис касб-ҳунар коллежининг бино ва иншоотлари тегишли ҳудуди билан биргаликда Бухоро давлат университетига оператив бошқарув ҳуқуқи асосида бепул берилади.

Бухоро озиқ-овқат саноати ва сервис касб-ҳунар коллежи унинг 2 ва 3-босқич ўқувчилари ўқишни битиргунларига қадар Бухоро ихтисослаштирилган маданият мактаб-интернати биноларида, Бухоро телекоммуникация технологиялари ва сервис касб-ҳунар коллежи унинг 2 ва 3-босқич ўқувчилари ўқишни битиргунларига қадар Бухоро давлат университети биноларида жойлаштирилади.