Британияда учар электротакси прототипи намойиш қилинди (видео)

Британияда илк бор вертикал ҳолда учиб-қўнувчи учар электротакси прототипи намойиш қилинди. The Times нашрининг маълум қилишича, бу такси мамлакатдаги илк шундай ишланмадир. Учар электротакси лойиҳаси устида Vertical Aerospace компанияси иш олиб бормоқда. Бундай турдаги машиналар eVTOL (electric vertical take-off and landing) деб аталади.

Нашрнинг маълум қилишича, компания учар таксини ишлаб чиқаришга қўйиб, яқин 4 йил ичида сотишни бошламоқчи. Бундан аввал эса парвозлар хавфсизлиги учун жавоб берувчи идоралар рухсатини олиш лозим.

Такси 4 нафаргача йўловчини таший олади ва деярли 300 км/соат тезлик билан уча олади. 4 та вертикал паррак билан жиҳозланган такси бир қувватланишда 150 кмгача масофани учиб ўта олиши кўзда тутилган. Аммо унинг кейинроқ ишлаб чиқилиши режалаштирилган кучлироқ версияси 800 кмгача уча олади.

Такси синови видеосида бир неча киши уни ангардан олиб чиққач, қурилма ҳавога кўтарилиб, бир неча метр учиб ўтганини кўриш мумкин. Намойиш қилинган прототип масофадан бошқарилган, таксининг якуний версияси эса бошқарилувчи бўлиши кўзда тутилган.

Vertical Aerospace компанияси британиялик таддбиркор Стивен Фицпатрик томонидан 2016 йилда ташкил этилган. Фицпатрик учар такси шаҳарлар орасидаги парвозлар учун жуда қулай бўлишига ишонч билдирмоқда. “Йўловчилар уйлари ёки ишларига яқин жойдан парвоз қилиб, белгиланган жойга қўна оладилар”, деб айтган Фицпатрик.

Бундай ишланмаларни яратиш билан турли компаниялар шуғулланиб келади. Мисол учун, Uber такси хизмати NASA билан бошқарилувчи учар такси яратиш бўйича битим тузган. Компания 2020 йилгача учар электротаксиларни синовдан ўтказишни, 2023 йилдан эса уларни эксплуатация қилишни бошлашни режалаштирмоқда.

Rolls Royce ҳам шундай қурилма устида иш олиб бормоқда. Компания ўз қурилмасини жорий йилнинг июль ойида Фарнборо авиасалонида тақдим қилганди. Ушбу қурилма 6 та электр двигател билан жиҳозланади, 5 йўловчини таший олади ва 400 км/соатгача тезлик билан уча олади.