Андижонда бокс бўйича халқаро турнир якунига етди

Жорий йилнинг 17-21 сентябрь кунлари Андижон олимпия захиралари мактаб-интернати спорт мажмуасида анъанавий, Ўзбекистонда хизмат кўрсатган мураббий Золотарев хотирасига бағишланган халқаро бокс турнири бўлиб ўтди.

Унда Ўзбекистоннинг барча вилоятлари ҳамда қўшни Қозоғистон, Қирғизистон давлатларидан 164 нафар спортчи иштирок этди. Ўнта вазн тоифасида ўтказилган баҳслар атлетлар орасида кўплаб янги юлдузлар етишиб чиқаётганини кўрсатиб берди.

Мусобақанинг тантанали ёпилиш маросимида Андижон жисмоний тарбия ва спорт бошқармаси бошлиғи Ўткирбек Тошпўлатов, Ўзбекистонда хизмат кўрсатган мураббий Марс Қўчқоров ҳамда таниқли мураббий Ўткирбек Ҳайдаровлар барча иштирокчиларни қутлашди.