Россия мудофаа вазирлиги 17 сентябрда Ил-20 самолётининг Суриядаги Ҳмаймим авиабазасига қайтиши вақтида уриб туширилгани бўйича янги маълумотлар тақдим қилди.
Янги маълумотларда Исроил самолётлари ва С-200 мажмуаси ракеталарининг сониялар бўйича ҳолати акс этган. Бу ҳақда мудофаа вазирлигининг расмий вакили генерал-майор Игорь Конашенков маълум қилди.
Маълумотлар Ҳмаймим авиабазасидаги С-400 тизими жанговар бошқарув пункти индикаторларидан олинган.
Конашенков махсус экранда Сурия қўшинлари томонидан отилган С-200 ракетасини кўрсатган. Экранда ракета Исроил самолёти томон йўналганини кўриш мумкин бўлган. Шунингдек, Ил-20 ва Исроилнинг F-16 самолёти қандай жойлашгани кўрсатилган. Таъкидланишича, F-16 самолёти Ил-20 билан бир азимутда 9 кмдан 10 кмгача баландликда бўлган.
Ракета парвози баландлиги иккала самолётникидан ҳам баланд бўлган. Сўнгра ракетанинг ўзи нишонга олувчи каллаги катта акслантируви сирт ва кичик тезликка эга самолёт, яъни Ил-20’ни мўлжалга олган.
“Кўриб турганингиздек, ракета Исроил самолётига яқинлаша туриб, йўналишини ўзгартириб, Ил-20 томон йўналган”, деб айтган Конашенков.
Унинг таъкидлашича, жанговар бошқарув пункти ракетанинг Ил-20’га теккани ҳолатини қайд қила олган.
“Исроил самолёти ракетадан Ил-20 ортига яшириниб, Сурия соҳилларидан ғарброқдаги патруллаш ҳудудида қолган. Исроилнинг қолган учта самолёти ҳам Латақиядан ғарброқдаги навбатчилик ҳудудини эгаллашни давом эттирган”, деб қўшимча қилган Россия вакили.
Ваҳоланки, Исроилда Ил-20 уриб туширилганда Исроилнинг барча самолётлари ўз давлати ҳаво ҳудудида бўлгани айтилган. Бундан ташқари, Исроил ушбу фожиага алоқаси борлигини рад этган ва бунда Сурияни айблаган.
Конашенковнинг айтишича, Россия самолёти қулагандан кейин Исроил самолётлари ҳалокат ҳудудида, улардан бири эса бевосита ракета теккан жой яқинида қолган. У ҳалокатдан кейин парвоз йўналиши ва баландлигини кескин ўзгартирган.
Конашенков янги маълумотлар Ил-20’нинг ҳалокати учун жавобгарлик тўлиқлигича айнан Исроил ҳарбий-ҳаво кучлари зиммасида эканини исботлашини таъкидлаб ўтган. Россия вакили Исроил мудофаа вазирлигининг Ил-20 фожиасига алоқаси йўқлиги ҳақидаги барча таъкидлари ёлғон эканлигини айтган.
