Бугун, 28 сентябр куни ўз ишини якунлаган Сенатнинг ўн олтинчи ялпи мажлиси давомида жамият ҳаётининг барча соҳалари ҳуқуқий асосларини мустаҳкамлаш ва мамлакатда амалга оширилаётган ислоҳотларнинг самарадорлигини оширишга хизмат қиладиган 21та масала, шу жумладан 14та қонун кўриб чиқилиб, маъқулланди.
«Давлат божхона хизмати тўғрисида»ги, «Хусусий бандлик агентликлари тўғрисида»ги, «Ўзбекистон Республикаси Давлат хавфсизлик хизмати кунини белгилаш тўғрисида»ги ва бошқа бир қатор қонунлар шулар жумласидандир.
Шунингдек, муҳокамалар якунлари бўйича вазирликлар ва идораларнинг, жойлардаги ижро ҳокимияти органларининг масъулиятини оширишга қаратилган ҳамда тезкор равишда ҳал этилиши тақозо этадиган муҳим масалалар юзасидан амалдаги қонун ҳужжатлари талаблари асосида тегишли қарорлар қабул қилинди.
Жумладан, қишлоқ хўжалигида норасмий бандлик даражасини қисқартириш ҳамда ишчиларни ижтимоий ҳимоялаш, шу билан уларнинг пенсия таъминоти кафолатларини мустаҳкамлаш бўйича давлат назоратининг ҳолати тўғрисида Ўзбекистон Республикаси Бош вазири ўринбосари Жамшид Қўчқоровга парламент сўрови юборилди.
Сенаторлар Бухоро вилояти ҳокимининг ҳудудларни ривожлантириш ва халқ депутатлари маҳаллий Кенгашлари фаолияти ҳақидаги ҳисоботини ҳам эшитишди.