Сенат аҳолини шовқиннинг зарарли таъсиридан ҳимоя қилиш тўғрисидаги қонунни маъқуллади

Сенатнинг ялпи мажлисида сенаторлар “Аҳолини шовқиннинг зарарли таъсиридан ҳимоя қилиш тўғрисида”ги қонунни маъқуллади.

Қайд этилишича, саноат корхоналари сони ошиши, кенг кўламли қурилишлар, шаҳарларнинг кенгайиб бориши, транспорт воситаларининг кўпайиши каби омиллар туфайли аҳолининг маиший ҳаётида шовқиннинг салбий таъсири ортиб бормоқда.

Амалда эса аҳоли саломатлиги ва осойишталигига, нормал дам олишига салбий таъсир кўрсатувчи зарарли шовқинларга қарши курашиш масалаларини комплекс тартибга солувчи ягона ҳуқуқий ҳужжат мавжуд эмас.

Шовқиннинг зарарли таъсири меъёрларини назарда тутувчи 7 та санитария норма ва қоида амал қилса-да, қонунчиликда бу борада қатъий талаблар белгиланмаган. Натижада ушбу санитария норма ва қоидаларига сўзсиз риоя этилиши таъминланмаяпти.

Бундан ташқари, қонунчиликда инсон саломатлиги учун зарар келтирувчи ва рухсат этилган даражадан юқори бўлган шовқинларни келтириб чиқараётган объектларни жавобгарликка тортиш масалалари тўлиқ ва аниқ белгиланмаган.

Ушбу қонун билан аҳолини шовқиннинг зарарли таъсиридан ҳимоя қилишнинг умумий қоидалари, давлат органларининг ушбу соҳадаги ваколатлари, аҳолини шовқиннинг зарарли таъсиридан ҳимоя қилиш бўйича чора-тадбирлар аниқ белгиланмоқда.

Шунингдек, фуқароларнинг осойишталиги ва нормал дам олишини бузадиган шовқинлар, фуқароларнинг осойишталиги ва нормал дам олишини бузишга йўл қўйилмайдиган вақтлар оралиғи, шовқиннинг зарарли таъсири учун компенсация тўловларига оид нормалар назарда тутилмоқда.

Бундан ташқари, жисмоний ва юридик шахсларнинг аҳолини шовқиннинг зарарли таъсиридан ҳимоя қилиш борасидаги ҳуқуқлари ва мажбуриятлари белгиланмоқда.