Футбол бўйича Ўзбекистон олимпия терма жамоасига Испаниядан янги мураббий тайинланади

Бу ҳақдаги хабарни ЎФА вице-президенти Умид Аҳмаджонов Kun.uz мухбирига тасдиқлаган.

Маълумки, футбол бўйича Ўзбекистон олимпия терма жамоаси олдига 2020 йили Токиода ўтадиган ёзги олимпия ўйинлари йўлланмасини қўлга киритиш вазифаси қўйилган.

Яқиндагина Ўзбекистон олимпия терма жамоаси бош мураббийлиги вазифасига «Бунёдкор» клуби бош мураббийси Миржалол Қосимов тайинлангани ҳақидаги хабарлар эълон қилинган эди.

«Олимпиадага йўлланма берувчи U23 ёшлар ўртасидаги Осиё чемпионати 2020 йилнинг январида Таиландда ўтказилади. Қитъа чемпионатига бориш учун саралаш турнирига эса келгуси йилнинг март ойида Тошкент шаҳри мезбонлик қилади.

Биз Миржалол Қосимовни Тошкентда ўтадиган турниргача футболчиларни саралаб, улар билан машғулот ўтказиш учун жамоага мураббий қилиб тайинлаганмиз.

Лекин аввал бошдан бу лавозимга ҳам чет элдан тажрибали мураббийлардан бирини тайинлаш учун музокаралар олиб бораётган эдик.

Айни пайтда 3-4 нафар номзоддан бирини танлаш борасида ягона тўхтамга келишимиз керак. Музокаралар биз кутганимиздан-да тезроқ ҳал бўлмоқда.  Бир ойларда Испаниядан олимпия терма жамоасига янги бош мураббий таклиф қилинади.

Миллий терма жамоа бош мураббийи Эктор Купер ҳам вазиятдан хабари бор. У ҳам Испания футбол бозорини яқиндан биладиган мутахассис сифатида шу жойга мурожаат қилишимизни маъқуллаган», — деган У.Аҳмаджонов Kun.uz мухбири билан суҳбатда.

Эслатиб ўтамиз, Осиё қитъасида U23 ёшлар чемпионатининг амалдаги чемпиони Ўзбекистон терма жамоаси ҳисобланади. Улар 2018 йил январда Хитойда бўлиб ўтган Осиё чемпионати финалида Вьетнам терма жамоаси устидан 2:1 ҳисобида ғалаба қозонишган эди.