Ravshan Haydarov olimpiya termasidan ketdi. Uning o‘rnini Mirjalol Qosimov egalladi

Osiyo o‘yinlarida muvaffaqiyatsizlikka uchragan O‘zbekiston olimpiya terma jamoasi bosh murabbiyi Ravshan Haydarov lavozimni tark etgan. 

O‘zbekiston futbol assotsiatsiyasi matbuot xizmati ma'lum qilishicha, Mirjalol Qosimov O‘zbekiston olimpiya terma jamoasining yangi bosh murabbiyi etib tayinlangan.

«O‘zbekiston olimpiya terma jamoasi oldiga 2020 yilda Tokioda bo‘lib o‘tadigan Olimpiadaga yo‘llanma olish vazifasi qo‘yilgan bo‘lib, bu yuksak mas'uliyatli vazifani amalga oshirish uchun murabbiylar shtabidan yetuk mahorat va katta tajriba talab etiladi. Ana shuni inobatga olgan holda, O‘zbekiston futbol assotsiatsiyasi 1-vitse-prezidenti Umid Ahmadjonov tomonidan Olimpiya terma jamoasi bosh murabbiyligiga bir qator nomzodlar ko‘rib chiqildi. Yakunda O‘zbekiston olimpiya terma jamoasi bosh murabbiyligiga o‘zbek futboli afsonasi, ayni paytda «Bunyodkor» klubini boshqarayotgan Mirjalol Qosimov nomzodida to‘xtalindi», deyilgan xabarda.

Umid Ahmadjonov Mirjalol Qosimov bilan bu mavzuda suhbatlashib, O‘zbekiston Olimpiya terma jamoasi oldida jiddiy va mas'uliyatli vazifa turgani, O‘zbekistondagi barcha futbol muxlislari terma jamoani Olimpiadada ko‘rishni intiqib kutayotganini, ularning ishonchini oqlash uchun barcha kuch va mahoratni sarflash, tinimsiz mehnat qilish zarurligini ta'kidlab o‘tgan. Shuningdek, Olimpiya terma jamoasiga futbolchilarni saralab olishda xolis bo‘lish, faqat eng munosiblarini tanlab olish kerakligi borasida ham so‘z yuritilgan.

O‘z o‘rnida Mirjalol Qosimov ham zimmasiga yuklanayotgan vazifaning mas'uliyatini to‘liq his qilayotganini ta'kidlab, O‘zbekiston olimpiya terma jamoasini Tokio-2020 ga olib borish uchun qo‘lidan kelgan barcha ishni amalga oshirishga va'da bergan.

Mirjalol Qosimov endilikda Olimpiya terma jamoasi tarkibini shakllantirish ishlarini olib boradi. Shuningdek, terma jamoaga nomzod futbolchilarni saralab borish, ularni yaxlit bir jamoaga aylantirish, raqobatbardosh, kuchli jamoa yaratish ishlari bilan shug‘ullanadi. O‘zbekiston futbol assotsiatsiyasi tomonidan ham Olimpiya terma jamoasi uchun zarur barcha shart-sharoitlar yaratilib, turli yig‘inlar va kuchli terma jamoalar bilan o‘rtoqlik o‘yinlari tashkil qilib boriladi.

Eslatib o‘tamiz, O‘zbekiston olimpiyachilari Osiyo o‘yinlarida chorak finalda Janubiy Koreya vakillariga mag‘lub bo‘lib, turnirdagi ishtirokini erta yakunlagandi.