«Монако» бош мураббийи Леонардо Жардим ўз лавозимини тарк этди. Клуб португалиялик мутахассис билан шартномани бекор қилингани ҳақида расман хабар тарқатди.
44 ёшли мураббий 2014 йил июнидан буён монегасклар жамоасига устозлик қилиб келаётган эди. У жамоа билан дастлабки икки мавсумида биринчи дивизионнинг учинчи ўрнини эгаллаган, 2016/17 йиллар мавсумида олтин, 2017/18 йиллар мавсумида эса кумуш медал соҳиби бўлган эди. Клуб унинг мураббийлик даврида Чемпионлар лигаси ярим финалига ҳам етиб борганди.
Ушбу мавсум старти «Монако» учун ўта муваффақиятсиз кечди. Жамоа охирги 10 ўйинда битта ҳам ғалабага эриша олмаган ва Франция чемпионати турнир жадвалида 9 турдан сўнг 6 очко тўплаган ҳолда (1 ғалаба, 3 дуранг ва 5 мағлубият) 18-ўринни эгаллаб турибди. Умуман, клуб жорий мавсумда ЕЧЛ ўйинлари ҳам қўшиб ҳисобланганда жами 11та ўйин ўтказиб, фақат бир марта, август ойи бошида «Нант» устидан ғалаба қозонган.
Матбуотдаги хабарларга қараганда, унинг ўрнини франциялик собиқ футболчи Тьерри Анри ёки италиялик мутахассис Клаудио Раньери эгаллаши мумкин.
