Эронда аёлларга стадионга кириш яна тақиқланиши мумкин

Эрон бош прокурори Муҳаммад Жафар Мунтазирий аёлларни футбол ўйинларини томоша қилиш учун стадионга киритилишига қарши эканини айтди.

16 октябрь куни Теҳрондаги «Озодий» стадионида Эрон ва Боливия (2:1) терма жамоалари ўртасида ўртоқлик ўйини ўтказилган ва унга 100 нафарга яқин эронлик аёллар кирган эди.

«Аёлларнинг стадионга киритилишига қаршиман. Биз - мусулмон давлатимиз. Аёл киши стадионга кириб, спорт либосини кийган ярим яланғоч эркакларни кўради, натижада гуноҳкор бўлади. Агар яна аёлларни стадионда кўрсам, Теҳрон прокурорига топшириқ бераман», — деб Мунтазирий сўзларини келтирмоқда Besoccer.

Аёлларнинг стадионга киритилмаслиги тўғрисидаги тақиқ Эронда 1979 йили, Ислом инқилобидан сўнг ўрнатилган эди. Ўтган йили ёзда мамлакат президенти Ҳасан Руҳоний аёлларга стадионларга кириши учун расман рухсат берган эди.