Афғонистонда сайловлар вақтидаги терактлар оқибатида 50дан ортиқ киши ҳалок бўлди

Афғонистон шарқидаги Нангарҳар вилоятида йўл ёқасида ўрнатилган портловчи қурилма ҳаракатга келтирилиши оқибатида камида 11 киши ҳалок бўлган. Бу ҳақда Associated Press хабар бермоқда.

Нангарҳар вилояти маъмурияти хабарига кўра, қурбонлар орасида 6 нафар бола ҳам бор.

Бу теракт учун жавобгарликни ҳозирча ҳеч бир ташкилот ўз зиммасига олаётгани йўқ. Бу ҳудудда «Толибон» ҳаракати ҳам, ИШИД таъсиридаги жангари гуруҳлар ҳам фаол.

Нашрнинг қайд этишича, портлаш Афғонистон парламенти қуйи палатаси учун сайловларнинг иккинчи кунида содир этилди.

Сайловлар 20 октябрь куни бошланган, шанба кунги давомли портлашлар туфайли 40дан ортиқ киши ҳалок бўлганди.