Индонезияда ҳалокатга учраган самолётнинг тезлик датчиги носоз бўлган

Индонезияда ҳалокатга учраган Lion Air авиакомпаниясининг “Боинг-737” самолётида тезлик датчиги носоз бўлган. Бу ҳақда Индонезия транспорт идоралари маълум қилди.

Датчик ўша машъум парвозда ҳам, аввалги бир нечтасида ҳам ишламаган.

Маълум қилинишича, датчик носоз бўлгани борт қайд қилгичи ўқилганда аниқланган. Бу носозлик самолётнинг камида аввалги 2-3 рейсида  аниқланган.

Шу билан бирга самолёт қулаши бўйича ҳозирча расмий хулосалар йўқ.

Самолёт 29 октябрда Ява ороли яқинида қулади. Самолёт бортида 189 киши бўлган. Алоқа йўқолишидан бироз олдин учувчи аэропортга қайтишни сўраган ва бунга розилик олган. Самолёт билан алоқа у Жакарта аэропортидан ҳавога кўтарилгандан 13 дақиқа ўтиб йўқолган. Шундан кейин самолёт денгизга тушиб, чўкиб кетган.